Shillong, ïaïong 10: Ka Seng GSU ka la maham ban pynkylla ïa ka jingpyntreikam ïa ka Roster System naduh u snem 1972.
Katkum ka kyrwoh ba la phah da u President u Tengsak Gabil Momin, ka Seng ka ong ba kam sngew ei ban ïakren halor ka jingpyntreikam shadien ne shakhmat haba pyntreikam ïa kane ka System ha ka Reservation Policy jong ka jylla hynrei kan nym ailad da lei lei pat ban pynkylla na kaei kaba la pyntreikam naduh u snem 1972 lane ban pynjngut ïa ka jingtreikam ka State Reservation Policy.
Shuh shuh ka Seng ka ong ba ka long ka jingshisha ba ki trai ri trai muluk ha Garo Hills bad kiwei pat ki jaidbynriew riewlum ha Garo Hills ki dang duna ha ka jingnang jingstad bad ka dang sahdien ha ka jingdon ki jaka pule kiba biang, ha kaba wat tang kawei ka Engineering College ruh kam pat don.
U Tengsak u la kubir ruh ba ka long ka jingshisha ba ki Samla na Garo Hills ki dang shem jingeh ban ïakhun bad kiwei pat ki samla jong ka jylla ha ka liang ka ïoh kam ïh jam bad dei namar kane ka daw ka jingpyntreikam ïa ka Reservation Policy ka long kaba donkam haduh katta katta.
Ka GSU ka la ïaroh ruh ïa ka sorkar kaba la pyntreikamïa ka Roster System kumba la btah da ka ïingbishar bad pyntreikam ruh katkum ka Reservation Policy. Ka la ïaroh ruh ïa ka ïingbishar kaba la ïohi ïa ka jingbymbiang ka State Reservation Policy namar ka jingbym don ka Roster System kaba la long ka jingduhnong kaba khraw ïa ki samla na Garo Hills.
Ha kajuh ka por u nongïalam ka VPP, u la ong ruh ba ka Seng kam ïahap bad ka jingong ka VPP ba ïa ka Polisi thungkam dei ban bhah katkum ka jingdon briew. Hynrei ka la ong ba dei ban bhah katkum ki lad ki lynti ne ki kabu ban ïoh kam ïoh jam ki samla.
