Ban pynbiang ki lad jingsumar, leit jngoh u MD NHM ïa ki jaka sumar ha Mahendraganj

Shillong, Nailur 06: U Managing Director ka National Health Mission ka sorkar Meghalaya u Ramkumar S, IAS u la leit ban jurip ïa ki jaka ai jingsumar ha ka koit ka khiah ha Mahendraganj CHC bad ha ka MCH.
Kane ka jingleit ban jurip ka long ban lap dalade ïa ka jingtreikam ki jaka ai jingsumar ha kitei ki bynta ba long kyndong ka jylla Meghalaya, ha kajuh ka por ban lap kiei kiba donkam ban pynbiang ha kane ka jingai jingsumar ha ki jaka sumar ba pang ba shitom jong ka sorkar.
Ha kane ka jingleit u la ïakynduh ïa ki doktor, kiba trei ha ka tnad ka koit ka khiah bad ha kane ka jingïakynduh kila ïakren ruh ha kino ki bynta kaba ki dang donkam ban pynbiang ha ki jingai jingsumar ha ka thaiñ Mahendraganj.
Da kane ka jingleit u Managing Director ka NHM sha katei ka thaiñ bad ka jingïakren bad kiba don ha kito ki jaka ai jingsumar ka la pynshai shuh shuh kino ki bynta ban dang pynbha ha kaba ai jingsumar sha ki paidbah.
Ha kane ka jingleit jurip la donlang u Dr. Noor Ain Khan, MS-cum-Sr. M&HO, Mahendraganj, nalor jong u la don ruh kiwei kiwei ki doktor bad ki nongtrei ha ki jaka ai jingsumar ban ïamir jingmut lang kumno ban pynbha ïa ki jaka ai jingsumar bad ki lad ki lynti ban kyntiew ïa ka koit ka khiah.