Ngi rben ka snieh doh wat la shah kynthoh khlem nongrim ngi ïai trei la ka kam : Dy CM

Shillong, Nailur 6 : U Symbud Myntri Rangbah bad National Vice President ka NPP u Bah Sniawbhalang Dhar ula ong ba ka Sorkar ba ïalam ka NPP ka don ka snieh doh kaba rben namar wat hapdeng ki jingkynthoh ba harukom kiba khlem nongrim ruh kam ju pynsngap ïa kita ki jingkynthoh pyrshah bad ka bteng beit ban trei ïa la ka kam na ka bynta ka bha ka miat bad ka roi ka par u paidbah khlem da ibeiñ ne leh shiliang khmat ïano ïano ruh.
Haba ïalap elekshon ha Maweit na ka bynta u kyrtong ka NPP u Dr DRL Nonglait ban ïakhun ïa ka elekshon shiteng samoi jongka MP Lok Sabha na kane ka Shillong Parliamentary Constituency, u bah Sniawbha ula ong ba ki liang pyrshah ki ñiew ïa ka NPP kum ka Sorkar ba leh donbor bad ka bamsap hynrei kam long satia kumta namar kane ka dei ka sorkar kaba trei hok la ka kam ban myntoi ki paidbah bad kiew ka jylla.
“Ki don kiba ong ba ka NPP ka dei ka Sorkar ba leh donbor, ka Sorkar kaba tuh. Nga kwah ban pynshai-phi kren katno katno ruh, ngim ju pynsngap bad ngim khuslai namar ngi la don ia ka snieh doh ba rben. Ngi donkam ban trei. Katba phi nang kynthoh ïa ngi, katta ngi dang kwah trei shitom da ki kam na ka bynta u paidbah. Kata ka dei ka Sorkar NPP” ula ong.
U Bah Sniawbha ula ong ba ka roi ka par hi kam dei ka kam kaba lah ban leh shimiet shimiet hynrei ka dei kaba hap pyntreikam da ka bynta bynta.
“Kum ka nuksa ka Civil Sub-Division- Lada ngi ai Block, ka Block kan lah leh aiu marwei?, Lada ngi ai College hynrei ym don ki nonghikai, mano ban wan? Ta ka daw ki nongïalam ki leh ïa ki kam da ki bynta bynta ne da ki wat” ula ong.
Ula kdew ïa ki project shna surok ban pyni ba ka Sorkar kam leh shiliang khmat ïano ïano ruh.
“Kiba bun na kine ki constituency ki dei kiba mihkhmat da ka UDP bad HSPDP, hynrei ngi dang ai project beit ïa ki. Kane ka pyni ba ka NPP kam leh shiliang. Ngam ong ba kiwei ki MLA kim treikam, hynrei ka NPP ka sngap ïa ka jingpan u paidbah” ula ong.
Halor ka jingïatreilang ka NPP bad ka BJP, u bah Sniawbha ula ong ba ka jingïatreilang na ka bynta ka kam pynroi kam dei satia ban pynïasnoh bad ka niam.
“Ki ong ba ka NPP ka trei shitom hynrei ka ïatreilang bad ka BJP, kam long kaba bha?. Tang namar ba ngi ïatreilang bad ka BJP, hato ngin kylla niam BJP noh? Kata kaba bakla. Ngi ïatreilang bad ka BJP ban wanrah ïa ki kam pynroi bad ban kyntiew ïa ka jingim u paidbah” ula ong.
“U Dr Nonglait u dei u Presbyterian. Nga dei na kawei ka niam. Hato kane ka mut ba ngan kylla niam noh. Ka Niam hi ka ïaid la ka jong, ka saiñ pyrthei ka ïaid la ka jong” ula bynrap.
U Bah Sniawbha ula ther tyngeh ruh ïa ki seng saiñ pyrthei kiba pyrta slogan “Ieid Jaidbynriew” khlem da leh pat ïa ka kam.
“Ki don ki seng saiñ pyrthei kiba ong ba ki ieid jaidbynriew. Ka jingieid ka don bun jait. U Kpa u lah ban ong ba u ieid ïa la ka kurim bad ki khun, hynrei khlem u khaw ha ïing, kam dei satia ka jingieid. Lada u MLA u ong ba u ieid ïa ki paidbah hynrei u khlem treikam, kane ruh kam dei ka jingieid” ula ong.
Ula ong ba ki jingkylla ki la paw ha ka thaiñ Mawshynrut bad kyntu ïa ki paidbah ba kin bteng ban kyrshan ïa ka NPP ban ïoh kham bun shuh shuh ki kam pynroi.