Sarong ba kiew ka PGI, hynrei miss ka PGI shisha, leh ïa ki kam pynroi khlong pat ka pisa nonghikai: KJDSTA

Shillong, Nailur 06: Babu Boswell S Pala President ka KJDSTA u la kynthoh jur ïa ka sorkar ba ka la leh ïa ki kam Pynroi, ban kyntiew ïa ki skul, bad kiwei pat ki kam Pynroi da kaba khlong noh ïa ka pisa jong ki nonghikai deficit bad u la pynpaw ruh ka jingsngew thamula ba ka sorkar ka sngew sarong ba katkum ka PGI ba ka la shna hi da ka jylla ban pyni ba ka pule puthi ka la kiew hynrei ka khlem peit ïa kawei pat ka PGI kata ka Parents Gratification Index ban tip la ki kmie ki kpa ki hun ne em ïa ka jingnang jingstad ki khun ne ka rukom hikai kaba biang watba ki nonghikai ki la shah thombor na ka por sha ka por.
Haba kren sha ki lad pathai khubor u Babu Pala u la ong ba ki nonghikai Deficit ki dawa ïa ka sorkar ba kan pyndam noh ïa ka jingpynbna ban pynduh noh ïa ki kam nonghikai Deficit kiba dei ki kam ba la mang naduh mynshwa bad ba kan pynhab noh ïa ki jingsiew hapoh ka Structure Payment Framework kaba la sngewthuh ba kam nonghikai mynta kan long noh kum ka Contractual basis.
U la kynnoh ba ka sorkar lyngba ka jingpynbna ka la shim kabu ïa ka jingkyrduh kam ki samla ha ka jylla bad ba nange shakhmat kino kino kiba kwah kam kin shim ïa ka kam hikai tang ban ïoh tulop bad ban siew katba mon bad pynhiar dor ruh ïa ka kam hikai ha ka Jylla.
U babu Pala u la pynpaw ruh ka jingsngew lyngngoh ba u Commissioner Secretary ka Education bad u Myntri ka Pule Puthi kim lah ban pynshai halor ka jingpynbna ban pynduh noh ïa ka kam nonghikai deficit.
Haba khot ïa ka jingkyrshan lang jong baroh ïa kane ka daw ba shong nongrim ki nonghikai, u Babu Pala u la ong ba ka jingdawa ki nonghikai kadei na ka bynta ka bha ka miat lang jong baroh bad ym ba leh kane ka sorkar kaba la nang pynsniew dur bad pynsniew tam ïa ka Pule Puthi ha ka jylla naba la ïohi kumba ka dei ka sorkar jong kito kiba don bad ka sorkar, da kito kiba don ha ka sorkar bad ka sorkar jong ki briew jong ka ym shuh na ka bynta ki paidbah, jong ki paidbah bad ïa ki paidbah.
U la ong ruh ba ka sorkar ka thombor ïa ki nonghikai naba ka sngew ba ka ïoh ki jingkyrshan na kiba bun ki liang, hynrei ban pynhiar dor ia ka kam long nonghikai kan ktah ïa kito ki samla kiba la leit pule B.ED bad kiwei ki kyrdan pule ban long nonghikai, namar lada ki trei ïa ka kam, kan ym ïahab satia bad kaei kaba ki la pynlut ha ki jingpynkhreh jingpule jong ki, kumta ka sorkar ka dei ban pyndam noh ïa ka jingpynbna ne notification lym kumta ki nonghikai kin sa ïa shong jingïalang ban shim pat da kiwei ki sienjam ban pynbor ïa ka sorkar.