Burom ka sorkar ïa ki nonghikai khlem da ai tulop bad pynduh ïa baroh ki jingmyntoi: GS KJDSTA

Shillong, Nailur 06: Ka Khasi Jaiñtia Deficit teacher’s Association ka la pynpaw ïa ka jingbitar kaba khraw ïa ka sorkar jylla khamtam eh ïa ka Tnat pule puthi ba la rakhe ïa ka Sngi burom ki nonghikai katba iabka tulop pat kam lah ban siew ha ka por kaba biang kaba kynthup ïa baroh ki jingïoh jingmyntoi kiba la pynsah la slem.
Haba kren sha ki lad pathai khubor ka General Secretary ka seng ka Kong Barbara Lamin ka la ong ba ki nonghikai baroh ki dawa ba ka sorkar kadei ban siew ïa ki tulop ha ka por ba biang, ban pynlait noh ïa ka Dearness allowance, ka CPF, nangta ka pisa ki nonghikai ba la shongthait kaba la lum la da ki phew snem bad shano kane ka pisa ka don, ban pynbeit noh ïa baroh kiba dei kum ka CPF NDS, ban pynthikna ïa ka kyrdan ki nonghikai ba la thung naduh u Ïaïong 2010, ban pynlait kloi ïa ka DCRG, ban pyndap ïa baroh ki kam ba lait, ban pynshai ki jingtreikam jong ka Board of Trustees, bad kiwei kiwei.
Ka la ong ba ka sorkar kadei ban burom ïa ki nonghikai da kaba sngap lem ïa ki hok jong ki ym ban burom tang da ka ktien.
Ka Kong Lamin ka la ïathuh ba ki nonghikai kim shym la ïoh ïa ka tulop na ka bynta u Naitung bad Nailar. “Ngim pat ïoh ïa ka tulop na ka bynta ar bnai. Ngi kyrpad ïa ka sorkar ban shimkhia ïa kane” ka la ong.
Shuh shuh ka la bynrap ba ka DA ka la shu neh beit 43% mynta lah ar snem bad dei ban pynkiew noh sha ka 49% kham kloi noh hapoh une u snem hynrei ka la don ruh ka jingpynsahteng kaba 51% naduh u Naitung 2025 bad 53% naduh u Kyllalyngkot 2026 kadei kaba dang sahteng. Ka CPF kaba 10% ka jingnoh synniang kaba la pynthikna naduh u Kyllalyngkot 2025 ym pat shym la pyntreikam, katba ka DCRG ka la neh beit khlem kano kano ka jingai jinghun.
Haba ïadei bad ki jinglait thylli ki kam, ka General Secretary ka la ong ba ki Sanctioned Post ki la sahkut thylli mynta lah 2-3 snem bad ym duna ïa ka 2 hajar tylli ki kam kiba lait. Watla katto katne ki Post kidei kiba lah dep ban pynbna paidbah bad la pynlong ïa ka Interview, ka jingai jingmynjur ïa ki kyrtong kiba la shah jied kadei kaba dang sahteng, katba ïa kiba bun hi ki Post ym shym la ai kano kano ka jingpynbna paidbah.
Ka seng ka la pyrshah jur ïa ka Tnad Pule Puthi kaba la pynmih ïa ka jingpynbna (Notification) No. ED.9/2026/31 ha ka 12 tarik u Nailar bad ka jingpynshai ne Clarification No. ED.9/2026/34 ha ka 19 tarik u Nailar, kaba tyrwa ban pynduh noh ïa ki Deficit bad ïa ki Post hikai jong ka Sorkar da kaba wanrah noh ïa ki hapoh jong ka SPF/SEMAM kum ka SSA bad Adhoc.
“Kane ka long kaba pynkyndit bha ban ïohi ba ka jia hapoh Meghalaya. Balei ban pynduh ïa ki Post kiba lah don lypa wat hashwa ban thaw ïa ka Jylla? Ka long ka bym don nongrim bad kaba bakla jur,” bynrap ka General Secretary.
Ka la ong, “Ngi pyrshah bad kyntait ïa kane ka Notification. Kam dei kaba don nongrim ne kaba ai ïa ka hok. Kan pyndkoh ïa ka kam pule puthi.” Ka la ong ba ka Association ka la ïakynduh ïa u Commissioner & Secretary bad ïa u Myntri Sorkar uba khmih ka Pule Puthi ban dawa ba dei ban pynduh noh ïa katei ka jingpynbna.
Ka la ong ba ka Notification kan ktah ruh ïa ka jingpynïaid shakhmat ïa ka jingthungkam ha kaba ki kyrtong kiba la shah jied ki dang ap ban ïoh noh ïa ka jingmynjur bad ka la byrngem ba ka Notification ka ban pynhiar ïa ka kyrdan jong ka jingsiew, ka ban pynhiar ïa ka burom bad pynjot ïa ka lawei jong ki nonghikai ka don ïa ka kabu ban pynjot lang ruh ïa ka pule puthi ha Meghalaya bad lada ka long ha kane ka rukom ïano yn kynnoh.