Jowai, Jymmang 10: Ha ka thong ban ong em ïa u duma ne ka World No Tobacco Day-2023 ka ban long ha ka 31 tarik u Jymmang, ki khynnah skul haman ki shnong ki thaw ka jylla mynta ka sngi ki la mih ban ïashim bynta haka Tobacco Rally bad Signature Campaign halor ka theme ba ong “My Meghalaya, Tobacco Free Meghalaya”.
Ha West Jaiñtia Hills District la sakhi ïa ka jingïashim bynta shongshit ki khynnah skul ha ka Rally Against Tobacco bad ka Signature Campaign kaba la pynlong ha ka dur jong ka jingïakop hapoh ka jingpeit jingpynïaid jong ka State Tobacco Control Cell ryngkat ka jingïatreilang ka State Education Department bad ka Sambanh Health Foundation.
La ïathuh ba ka jylla Meghalaya kadei kawei na ki Jylla ba bun eh ki briew ba kyrni ha ka jingdih biri, siktret, duma bad ka long ruh ka jylla ba bun eh ki briew baïoh ïa ka jingpang bampong na ka daw jong ka jingdih biri, sikret, duma.
Kumta ka jingpynlong ïa kane ka prokram ka long shibynta ban khot kyrpad bad wer ïa ki paidbah nongshongshnong ban kin ïatreilang da kaba kiar na ka jingmlien ban im ryngkat ka jingpyndonkam ïa u biri, sikret, duma kiba long ka bih ïa ka jingim ba kordor jong ki briew.
