Ban ïoh lum jingnang jingtip ki samla pule, da ka kamra kynshew kot plie ka Ri Bhoi Synod College

0

Nongpoh, Naitung 13: Kum shi bynta ban ailad ïa ki samla pule kiba wan ban pule ha ka Kolej ban ioh lum jingtip shaphang kiba bun jaid ki jingnang jingtip kiba dei katkum ka juk ba mynta, nalor ka kam ba ki pule ïa ki kot ha ki Kolej, ka Ri Bhoi Synod College kaba don ha Umsaitsning ha ka Sngi Balang jong ka taiew ka la lah ban plie paidbah noh da kata ka kamra kynshew kot (Library Room) ha katei ka kolej.
Ïa kane ka College library la wan ban plie paidbah da u MLA ka Umsning Constituency, u Dr. Celestine Lyngdoh kum u kongsan bad u MLA ka Nongpoh, u Bah Mayral Born Syiem kum u symbut kongsan. Nalor ki samla pule bad ki nonghikai jong kane ka Kolej, kiwei kiwei kiba la ïa don lang ki kynthup ïa ka jingdon lang ka Dr. Jacqueline Thabah, faculty member ka HEHU na ba dei peit ïa ka Library, u Rev. H.L Marsing, President ka Governing Body jong ka Kolej, u Rev. Precious Tmung, Vice Principal ka Kolej bad kynthup kiwei kiwei ki riew pawkhmat na Ri Bhoi.
Kumba la pynpaw da ki bor pynïaid ka Kolej, kaneka jingplie ïa kane ka Library Rook na ka karam kynshew kot ka long shi bynta ban ïarap ïa ki samla pule ba kin ioh lum jingtip da ki jingdon ki kot bapher bapher ban lum jingnang jingstad khamtam sha kito ki samla kiba ju pylut por ban wad jingtip ïa kiwei kiei kiba dei shaphang ka mynnor bad kiba dei haduh kane ka juk ba mynta.
Haba kren ha kane ka sngi kum u kongsan, u Dr. Celestine Lyngdoh, MLA ka Umsning, u la pynpaw ka jingkmen ba ka Ri Bhoi Synod College ka la shim sa ïa ka sienjam ban buh kyrpang da kita ki Library Room ba myntoi ki samla pule bad kine baroh ki urlong ka dei namar ka jingshim khia ki bor pynïaid jong ka Kolej ba ka jingmyntoi pat ka leit sha ki samla pule.
Kum ka jingai mynsiem `ïa ki samla pule katei ka Kolej, u Dr. Celestine Lyngdoh u la kyntu ruh ïa ki samla pule ba ki dei ban pyndonkam ïa kane ka Library Room da kaba kin lum ïa ka jingnang jingtip kaba ai jingmyntoi ïa ka jingim jongki bad ruh u la ong ba kum ki samla pule ban poi sha ka thong jong ka jingjop kum ki samla pule kam shym mut ba tang ban poi sha ka Kolej la biang katba kim tip ei ei pat ïa ka jingpule kaba long tang ka jingpynsyrwa kai ïa ka por, u la bynrap.
Na ka liang u Bah Mayral Born Syiem kum u symbut kongsan, haba ai mynsiem ïa ki samla pule kiba la ioh ïa kane ka library rook, u la ong ba kane ka juk ba mynta ka dei ka juk jong ka jingwad jingtip bad ym shuh kata ka juk hyndai kaba ïakhun thma da kaba pyndonnkam da ki wait ki sum bad mynta ka jingnang jingstad ka long kaba donkam hakhmat eh ban poi sha kano kano ka thong jong ka jingim.

Leave A Reply

Your email address will not be published.