Tyrwa ka ECC ban ïatreilang ban pynpra ïa ki 34 tylli ki karkhana coke kiba tei be-aiñ hapoh EJHD

Khliehriat, Naitung 13 : Hadien ka jingpynpra ïa ki ar tylli ki karkhana Coke kiba don hapoh ka elaka Sutnga, ka Environment Coordination Committee (ECC) jong ka elaka Sutnga ka la pynpaw ka jingsngew kmen bad sngew ïoh mynsiem bad ki nongialam bad ki dkhot ka ECC ki la leit ruh ban ïakynduh bad u Deputy Commissioner, u Abhilasah Baranwal, IAS bad sngew kmen shibun eh ba u tei u khlieh duh jong ka District u la shim khia lem halor kane.
Lyngba u kyrwoh, ka ECC ka la pynpaw ba kane ka dei ka mat kaba ka ECC ka la ieng pyrshah bad iakhih ruh mynta la ar snem halor ka nongrim ba dei beit ban pynduh pyndam noh ïa kito ki karkhana coke kiba shu tei beaiñ hapoh ka elaka Sutnga.
Na ka liang ka ECC ka maham jur ruh ba hadien kane ka jingpynpra bad pynduh pyndam ïa ki karkhana Coke ba beaiñ ka jingiakhun jong ak ECC kan kham suk na ka bynta kito kiba la dep ioh ïa ka CTE bad CTO bad ka pynrem ruh ïa ka jinglong thulmur ka tnat Meghalaya State Pollution Control Board kaba la ai khlem sngewthuh ïa ki CTO.
Kumba long mynta, ka iïngbishar Meghalaya High Court ka la buh jingkylli ruh halor kito ki briew kiba don kti ha kaba pyntrei beaiñ ïa ki karkhana Coke hapoh ka district, halor kane na ka liang ka ECC ruh ka la long ba la kloi ban ïa snoh kti lang ban pynduh pyndam noh ïa ki karkhana beaiñ, namar na ka liang ka ECC ka la don lypa ki sakhi, satar kiba biang kiba pyni shynna ruh ba ki dei ki ba shu wan leh benami hangne hapoh ka district bad ïa kane la lap lyngba ka jingwad RIT ha kaba ki don haduh 32 Unit kiba la long trai da ki bar jylla kum ki benami khamtam ha kito ki karkhana Coke kiba la ioh ïa ki CTO.
Kaba pynlyngngoh shuh shuh ïa ka ECC ka long ba watla ki kam ki dang sahteng ha ka iïngbishar kata hapoh ka High Court bad ha ka Supreme Court bad wat hapdeng kiba bun tylli ki memorandum ba la phah sha u myntri rangbah ka jylla, hynrei dang myn ha ki khyndiat bnai ba la leit ka tnat Meghalaya State Pollution Control Board ka dang pyllait sa lai tylli ki CTE Unit jong ki karkhana coke hapoh ka district bad kita ki dei ka M/s Magic Coke, M/s, M.M Minerals bad ka M/S Presidium Breeze kiba ha Nongsning, Elaka Sutnga, kane ka la pyn artatien ruh ïa ka ECC bad pynpaw ruh ba donkam ban ioh ïa ka jubab kaba shai ba ha kano ka rukom ka tnat MSPCB ka ioh ïa ki kot donkam ban pyllait ïa kitei ki Unit.
Na ka liang ka ECC ka dawa ba dei ban weng noh ïa ki CTE kiba dang shu ai ha kine ki khyndiat taïew ba la leit bad lada ym lah ban weng, ka ECC kan sa shim da kawei pat ka lynti ha kajuh ka por u heh sorkar ba dei peit ïa kane ka kam u dei ban ai ka jubab halor kane.
Kane ka jingioh ïa ki CTE ka paw shai ba kane ka sorkar kam suid ñiew ei ei ïa ki briew jong ka district watla ka la mih ka jingpyrshah ïa ki karkhana coke hapoh ka district.
Khnang ba ka kam kan kham kloi, ka ECC ka tyrwa ruh ban iatreilang bad ki bor distrcit ha kaba pynpra, pynduh pyndam noh ïa ki 34 tylli ki karkhana coke kiba pyntrei beaiñ hapoh ka district.