Halor ka jingsniew ka surok Nongtalang – Dawki leit kynduh EE ka FKJGP War Jaintia

Jowai, Naitung 13: Ka Federation of Khasi Jaiñtia & Garo People (FKJGP) War-Jaiñtia Circle hynnin ka sngi 12 tarik Naitung kala leit ban ïakynduh ïa u Executive Engineer PWD Jowai Central Division West Jaiñtia Hills ha kamra treikam jong u ha Jowai ban pynkynmaw halor ka jingthoh (complaint) kaba la dep buh haka 5 tarik Naitung 2023.
Ha kane ka jingïakynduh na ka liang ka seng ka dawa jur ba dei ban maramot biang ïa une u surok naduh Nongtalang sha Dawki namar ula sniew bad pei thliew ha shilynter. Kum ban pynshu kynmaw ha ka jingleit jurip jong ka seng ïa une u surok ha kine ki taïew ba la dep la lap ba ka rukom pyntrei ïa u surok kam biang namar tang hadien 3 bnai ula kylla sniew bad pei thliew noh ha shilynter bad kane ka buh jingeh shikatdei eh ïa ki nongleit nongwan lyngba une u surok uba dei shisha u budlum ka roi ka par ka khaïi pateng hapoh ka thaiñ War Jaiñtia.
Ha ka jingïakynduh na ka liang u EE ula kular ba ïa une u surok yn maramot biang bad kin leh shwa tang ïa ki thliew (pothole) bad ïa mynta namar ba dang slap kim lah leh eiei bad tang shu rang ka bneng kin sa trei biang. Kumta na liang ka seng ka la ban jur ba kan ïai buddien bad lada katei ka ophis kam leh ïa ka jingdawa, na ka liang ka seng kan sa leh ïa kaba donkam. Ha kajuh ka por ka seng ka la pynkynmaw ïa ki kam ba sahteng kum ki Speed Breaker ha Ladjaplem, hynrei na ka liang u EE ula kular ba ha kine ki khyndiat sngi kin pynshna noh tang shu rang ka bneng.
Ha kane ka sngi la ïadonlang u President FKJGP War Jaiñtia Circle bah B. Mukhim, General Secretary bah Kynsai M Khonglah, ma Marhok Myrboh General Secretary FKJGP West Jaiñtia Hills District. Kane ka long katkum ka kyrwoh ba la phah da u President bah Shlur Mukhim.