Jowai, Naitung 13: Ka Khasi Students’ Union (KSU) Lapangap Unit mynta ka sngi kila leit ïa kynduh ïa u Deputy Commissioner ka West Jaiñtia Hills District u bah B.S. Sohliya (IAS) hadien ka jingwan pynjulor ki paid Karbi ïa ki tynrai dieng kiba dang shu dep thung da ki nongshong shnong ka Lapangap West Jaiñtia Hills District.
Katkum katei ka shithi jingujor sha u DC la pynpaw ba ïa kitei ki tynrai dieng la dep thung dang shi taïew mynta ha ka jaka khappud bad ka shnong Tahpat kiba la don haduh 2 hajar tynrai lyngba ka jingïarap naka skim jong ka Meghalaya Basin Development Authority, Jowai, hynrei ïa kitei ki tynrai dieng la shah pynjulor noh ha kane ka 12 tarik mynta u bnai da ki briew ka Karbi ha ryngkat ka jingsynran lang ki pulit Assam. Hadien ka jingïakynduh bad u DC kitei ki nongïalam seng ha ka jingkren sha ki lad pathai khubor kila pynsngew ba kane ka jingleh jong ki paid Karbi kala long shaba palat bad kane ka lah ban dei tang ka jingthmu jong ki ban ïoh kyntur pud shapoh u pud u sam ka jylla Mghalaya.
Halor kane kila pyntip ba na ka liang ki bor ba dei peit ïa kitei ki deing kila dep ban ujor da ka ejahar bad la kyntu jur ïa ki bor District ban shim khia marnor ïa kane.
Shuh shuh kitei ki nongïalam ka seng kila pynsngew na ka por sha ka por ki briew jong ka Assam kila wanrah ïa ka jinghuri hura bad ki nongshong shnong ka Lapangap bad na ka liang ka KSU kala kren shai lada kane ka dang pteng ka seng kam banse ban sdang noh ïa ka jingïaleh pyrshah ïa ka paid Karbi.
