Ban ïarap ïa kiba duna dkhot met ban pyndep ïa ka hok thep vote, yn pynkhreh ka DSWO da ki Wheelchair

Jowai, K’lyngkot 12: Ka jingïalang kaba la khot pynlong da ka ophis jong ka District Social Welfare Officer, West Jaiñtia Hills District na ka bynta ki lai tylli ki Rehabilitation Workers jong Block Amlarem, Thadlaskeiñ bad Laskeiñ C&RD Block kaba la long ha kane ka 10 tarik kila ïoh ban ïakren ïa shibun ki kam ha ka jingïadei bad ka jingthep vote jong ki briew kiba don jingduna ha kane ka elekshon MLA ka ban sa long shen.
Kum ka jingïarap ban pynsuk ïa kine ki briew ba don jingduna ka tnad Social Welfare kan sa buh da ki Wheelchair ha ki jaka thep vote (Polling Station) khnang ban pynsuk ïa kine ki briew ban ïoh pyndep ïa ka hok thep vote jong ki. Katkum ka jingkheiñ bala ai da kane ka tnad lyngba ka District Social Welfare Officer kong J.Synnah la ong ba ki don 1617 ngut ki briew kiba don jingduna kiba la ïoh ïa ka hok ban thep vote hapoh ka West Jaiñtia Hills District.
Ha kane ka jingïalang la wan ban ai ka jingpynsngewthuh da u bah D.R.J Syiem uba dei u Nodal Officer ka Unique Disability ID Project, State Resources Centre on disability Affairs, Civil Hospital, Shillong bad la ïadon lang ki nongmihkhmat na ka tnad Election Jowai ban ïapylliew jingmut halor kane ka kam kaba ïadei bad ki briew kiba don jingduna hapoh ka District ki ban sa ïashim bynta ha ka jingthep vote.
Ban pynsuk shuh shuh ïa ka jingïarap ïa ki briew kiba don jingduna, ka sorkar kala buh ïa ka App kaba la ai kyrteng ka PwD Mobile App ba kin ïoh ban pyndap ïabaroh ki jingdonkam jong ki kaba ïadei bad ka jingthep vote. Ïa kane ka App lah ban ïoh na ka website jong ka ECI.