Nongpoh, Ïaïong, 27: Ki bor pulit jong ka Ri Bhoi District lyngba ka tnad Traffic kim shym la shong kli kti bad na ka bynta ban ïada ïa ki paidbah ne ki nongleit nongwan na ki jingjia ba sngewsih, ki la dang pyrkhing ban tehlakam ïa ki kali paidbah ba pynher sted ha ki surok paidbah.
Kum ban pynkynmaw, tang ha kine ki khyndiat bnai, bun ki mynsiem ba kordor ki la duh noh ïa la ka jingim na ka daw ka jingpynher sted bad pynkheiñ ïa ki kyndon aiñ ñiah kali khamtam ha ka surok bah National Highway-6 bad ha ka surok Shillong By-pass.
Ban shim ïa ki lad jingïada bad na pynduna ïa kum kine ki jingjia ba sngewsih, ka tnat Pulit na Ri Bhoi kumba ka la ju pyrkhing ka la dang bteng ruh ban tehpyrkhing ïa ki kali paidbah kata naduh ki Kali saw shaka haduh ki thuk thuk ar shaka ba kim dei ban pynkheiñ ïa ki kyndon ñiah kali bad ka thong hi ka long ban pynduna ïa kino kino ki jingjia ba sngewsih kiba la ju jia na ka por sha ka por tang na ka daw ka jingpynkheiñ aiñ.
Ka surok National Highway-6 ha Ri Bhoi ha ki bnai ba leit noh kam dei shuh ka surok kaba ki kali paidbah ki pyndonkam na ka bynta ka leit ka wan, hynrei kiba bun ki samla khamtam na Assam ki ju poi sha kane ka surok bad ki la pynlong kum kata ka jaka ïa pynher ïa ki ar shaka. Dei lyngba ka jingpyrkhing ki bor pulit ka Ri Bhoi kane ka jingïapynher ïa ki ar shaka ka la kut noh, namar na ka liang ki bor pulit na ka por sha ka por ki ju peitngor bad tang shu lap ki la shah bat bad ki la shah pynhap ha ki kyndon jong ka aiñ.
La sakhi ruh ba ki bor pulit ka Ri Bhoi lyngba ka tnat Traffic, nalor ba ki la peitngor bad pyrkhing man ka sngi ïa ki kali ba pynkheiñ aiñ bad ki kham peitngor ruh man la ka sngi u Blei, namar bun kiba wan na shabar ki ju pynher sted ïa ki kali bad khamtam ki ar shaka khlem da phong ïa ki helmet kaba long ka jingma ym tang ïa ki nongleit nongwan bad bun ruh ki jingjia ba sngewsih ki la jia ba ki mynsiem ba kordor ki duh noh na ka daw ka jingñiah khlem akor bad ka jingpynher sted palat ïa ki kali.
Haba kren halor kane ka jingshngaiñ ki paidbah ha ka leit ka wan (Road Safety), u Senior Superintendent of Police ka Ri Bhoi, u V.S Rathore, dang shen ruh u la kren sha ki lad pathai khubor, ba ka tnat Pulit na Ri Bhoi kan nym shong thaid ban tehlakam ïa kiba pynkheiñ aiñ bad nalor kata ruh ka tnad pulit kan peitngor ruh ha baroh ki liang ban pynthikna ba ki paidbah kin bud ryntih ïa ki aiñ ñiah kali bad ruh ban ïada na ki kam sniew khnang ban nym ktah ka shongsuk ka shongsaiñ ki paidbah.
Mynta ka sngi U Blei ruh, ki pulit ka tnat Traffic ki la peitngor bha ïa ki thuk thuk ar shaka bad shi kynhun ki la shah tohkit ha ki bor pulit bad hadien ba la tohkit bad kitei ki nongñiah ki la bud ryntih ïa ki kyndon, ki bor pulit ki la pynlait noh ban leit bad na ka bynta kito kiba pynkheiñ aiñ kin ngat beit katkum kai kyndon aiñ, kumba la kren shai dang shen da u heh pulit ka Ri Bhoi sha ki lad pathai khubor.
