Pyrshah ka HSPDP ïa Uranium bad ka jingpynbeit pud ka dei ban long katkum ki Khana pateng : KP Pangniang

Shillong, Naitung 09: Ka seng HSPDP ha ka sngi Palei ka la kren da kaba shai kdar ba kan ïai pyrshah beit ha kaba ïadei bad ka jingthmu ban khlong ïa u mar pohkhyndew u Uranium ha kane ka jylla.
Haba kren sha ki lad pathai khubor u President jong ka u Bah KP Pangniang u la ong ba ka seng kan ïeng Rangbah ïa kane ka rai kaba la sdang naduh ki por jong u ma Ieid Hopingstone Lyngdoh bam kwai ha dwar u Blei uba la pyrshah naduh kaba sdang.
Ha kawei pat ka liang ka HSPDP ka kren da kaba shai ba ka Langpih kaba don ha West Khasi Hills kadei hi kaba hab ha Jylla Meghalaya.
Na ka liang jong u Bah KP Pangniang u la ong ba katkum ki Khana pateng, bad kiwei pat ki mat la shem hi ba ka Langpih ka dei hi kaba hab hapoh West Khasi Hills bad ym don jingartatien ïa kane bad u la ong ba ka seng ka pdiang ïa ka jingthaw biang ïa ki regional committee pynbeit pud jong ka jylla bad kumjuh ruh ka dap da ka jingsngewnguh halor kane ka kam.
Ha kaba ïadei bad kane na ka liang ka seng ka la pynpaw ruh ba ka sorkar ha kane ka wat ïakren kaba mynta ban pynbeit ïa u pud u sam khamtam ha ki 6 tylli ki jaka ïakajia pud kadei ban shim lang na baroh ki liang khnang ba kan wanrah kano kano ka jingeh hadien habud.
“Ha kaba ïadei bad ka Langpih, ngi dawa ba ka sorkar kadei ban khmih lyngba ki khana pateng ki jingdon ki jaka bad ym dei ban sngap ïa ki khar Nepali, naba kine ki jait bynriew ki dei kiba la shu wan shong ha kane ka thaiñ lyngba ka jingïarap lang jong ki bor saiñ pyrthei kumta ka sorkar jylla ka dei ban shim lyngba ki jingdon jong ki kot ki sla kiba la long naduh ki por mynbarim bajah bad kiwei kiwei ki jingdonkam bad kumba ka long mynta ka seng ka ïeng beit triang ban kyrshan ba ka Langpih ka dei kaba hab ha Meghalaya,” ong u President ka HSPDP u Bah K P Pangniang.