Yn ïaid beit shakhmat ka jingpynbeit pud hapdeng ka Meghalaya bad Assam : Ong u Myntri Rangbah ka Assam ha Jowai

Shillong, Naitung 09 : U Myntri Rangbah ka Assam, u Himanta Biswa Sarma, ha ka sngi Palei u la ong ba ka jingïakren pynbeit pud hapdeng ka Assam bad Meghalaya ka dang ïaid shakhmat bad ym don kano kano ka jingïapher jingmut hapdeng ki ar jylla.
Haba kren sha ki lad pathai khubor ha ka jingwan jong u sha Jowai ban shim bynta ha ka jinglehniam Behdieñkhlam, u Himanta u la ong ba u ju ïakynduh man ka por bad u Myntri Rangbah ka Meghalaya, u Conrad K. Sangma bad kumjuh ïa ki Symbud Myntri Rangbah, ban ïakren halor kino kino ki mat kiba mih ha ki thaiñ khappud.
“Ka lad jingïakren ka plie beit. Ngi ju ïakynduh man ka por bad ym don kano kano ka jingïakynad hapdeng jong ngi. Lada mih kano kano ka jingeh ha u pud u sam, ngi ju ïatreilang ban pynbeit ïa ka da ka mynsiem jingïalong paralok,” la ong u Himanta.
Haba la kylli halor ki khubor ba ju mih shaphang ki jingïakajia ha ki thaiñ khappud, u Myntri Rangbah ka Assam u la ong ba um ïohi ba ka don kano kano ka jingeh kaba khraw. “Ngam tharai kan long kumta… baroh ki long kiba ïaid beit,” u la ong.
Ka jingkren jong u ka wan hadien ba ka Sorkar Meghalaya ka dang shu pynbha biang ïa ki Regional Committee ban bteng ïa ka wat kaba ar jong ka jingïakren ban pynbeit ïa u pud u sam hapdeng ka Meghalaya bad Assam.
Ïa kine ki Committee la bynshet ban bishar bad ai jingmut halor ki hynriew tylli ki jaka kiba dang don jingïakajia, kata ha Langpih, Borduar, Nongwah-Mawtamur, Deshdemoreah, Block I bad Block II, bad Psiar-Khanduli.
Ka jylla Meghalaya bad Assam ki la dep ban soi ïa ka soskular ha u Lber 2022 ban pynbeit ïa ka jingïakajia pud ha ki hynriew tylli na ki 12 tylli ki jaka jingïapher pud.
Ka wat kaba ar mynta ka thmu ban wad ïa ka jingïasngewthuh jingmut bad ban pynbeit noh ïa ki hynriew tylli kiwei ki jaka kiba dang sah.
Dang shen u Myntri Rangbah ka Meghalaya, u Conrad K. Sangma, u la ong ba ki Regional Committee kiba la thaw thymmai kin ïakren bad ki paidbah bad ki kynhun bad ba kin aiti ïa ki jingai jingmut sha ka sorkar ban pynurlong ïa ka wat kaba ar jong ka jingïakren halor u pud u sam.