Balei mih lama NPP ha prokram sorkar,bynñiaw ki ophisar ha ka jingbuh mawnongrim surok Maweit
Hato yn shna ïa kane ka surok na ka pisa jong ka NPP?

Shillong, Nailur 30: Ki paidbah ka jylla mynta ka sngi kila dap da ka jinglyngngoh kaba khraw ban ïohi ïa ki spah tylli ki lama NPP ha ka jingplie ïa u mawnongrim ban pynbha ïa ka surok na Nongstoiñ sha Maweit.
ïa kane ka prokram la pynlong da ka tnad PWD ha Maweit, ha kaba u Myntri Rangbah u la long u Kongsan bad la ïadon lang ki MLA ka NPP, u Bah Mac Millan Byrsat, MLA Nongstoiñ, u Bah Gigur Myrthong MLA ka Mawshynrut bad kiwei kiwei.
Kito kiba la ïohi ïa kabe ka jingïalang ha ka Facebook Page jong ka Seng NPP ki la kyndit thret ban ïohi ïa ki paidbah kiba la rah ïa ki lama jong ka Seng NPP.
“Lada kadei ka prokram jong ka Seng NPP, ngim ong eiei. Hynrei kadei ka prokram jon ka sorkar MDA. Kumno mih ka lama NPP. Hato ka jinglut ban pynbna ïa kane ka surok kadei na ka pla jong ka Seng NPP”, la ong u General Secretary ka HYC, u Bah Roy Kupar Synrem.
Kiwei kiwei pat ki rangbah ki la ong ba ym ju kham jia koit ba ha ki prokram jong ka sorkar ki paidbah kin ram da ka lama jong kawei ka Political Party.
La ïathuh ba ki don ki ophisar sorkar kiba don lang ha katei ka jingïalang kiba la pynpaw ka jingsngew bynñiaw ïa ka jingrah lama jong ka Political Party, da kaba ong ba ki leit ha katei ka prokram ym kum ki briew ka NPP, hynrei ki leit kum kii nongtrei sorkar ïa kaba kim dei ban pynpaw ba ki don liang sha kano kano ka Party. Wat ki kyndon jong ka sorkar ruh kim shah ïa ki ban leh kumta.
Ym shym la tip mano ba kynshoit ïa ki paidbah ban rah lama NPP. Hynrei don kiba suba ba kin dei hi ki briew ne ki nongïalam ka NPP kiba la bthah ïa ki paidbah ban rah ïa ka lama jong ka Seng.