Long katba long ngin tur beit sha Secretariat bad ki khun jong ngi, ong ki Nonghikai kontrak

Shillong, Nailur 30: Ki nonghikai skul kontrak kiba don hapoh ka shatri jong ka Meghalaya Government Lower Primary School Contractual Teachers’ Association (MGLPSCTA) ha ka sngi thohdieng ki la ïathuh ba na ka liang jong ki kin sa tur beit Secretariat ryngkat bad ki khun ki kti jong ki lada ka sorkar ka dang ïai leh mynthi ïa ka jingkyrpad ban thungkam biang ïa ki nonghikai kiba la shah weng kam naduh u bnai Kyllalyngkot, 2021.
Haba kren sha ki lad pathai khubor u President ka seng u Babu Birbor Riangtem u la ong ba na ka liang ki nonghikai ki la ai por ïa ka sorkar shitaiew ba kan pynurlong ïa kaei kaba ki la dawa la slem bah ïa ka sorkar bad kaba ki la pynlong ruh da ka iingïakhih kaba la kot sha ka 23 sngi da kaba shong ïakhih ha khmat u Mot jong u Kiang Nangbah.
U la ong ba na ka liang ki nonghikai ki la pynlong ïa ka jingïalang ha ka 22 tarik Nailur ha Khasi National Dorbar Hall ka la rai ban aiti da ka jingthoh ha u Myntri Rangbah ka Jylla u Conrad kongkal Sangma bad sha u Lat ka Jylla ba kin sngew kin sngap ïa kane ka jingkyrpad hynrei lada ka Sorkar kam leh eiei kine ki nonghikai kim banse ban pyni da ka bor ïa ka Sorkar.
“Lada ngim ïoh jubab eiei ngim banse ban pynkheiñ aiñ watla ngim kwah ruh namar ngim lah shah shuh ban shu kohnguh beit namar na ka liang jong ki kim mon satia ban sngap ïa ngi, kampher ki pynjari 144 CrPC hynrei ngin ïaid shakhmat kumba nga la ong sha khmat” u la bynrap.