Rai ka Elaka Satpator ban nym ai NoC katba ym pat beit u pud u sam

Shwa ban ker sainar shiah na Muktapur- Jaliakhola

0

Jowai, Nailur 30: Ki nongshong shnong ka Muktapur bad ki nongrep kiba don ha khappud bad ka ri Bangladesh ha ka sngi Thohdieng ki la pynlong ïa ka jingïamir jingmut ryngkat bad ki ophisar jong ki bor synshar ka West Jaiñtia Hills District kaba la long ha ka shnong Muktapur.
Kane ka jingïalang ka long kyrpang halor ka jingpan No Objection Certificate (NoC) ka ophis u Deputy Commissioner na ka Elaka Satpator Dolloiship ban sdang ïa ka ker sainar shiah (Border Fencing) na Muktapur-Jaliakhola kaba kynthup ïa u Border Pillar No 1283/7s haduh u Border Pillar No 1301/4s da kaba eh ïa ki jaka kiba don kumba 150 Yard na ka jaka ba thmu ker Sainar Shiah.
La ïathuh da ki nongïalam ka CCIB naduh ba la ïoh ïa ka jinglaitluid jong ka ri India, ka jylla Meghalaya haduh mynta kam pat ïoh ïa u pud u sam uba pura, hynrei u pud u sam u dang long tang uba tang shipor ne Temporary Boundary bad kaba dang don ruh haka jingïateh hapdeng kine ki ar tylli ki Ri kaba la tip kum ka Indo-Bangladesh Boarder Agreement 1975.
Na ka liang ki bor Sorkar ruh ki la pyrshang ban pynsngewthuh ïa kane ka kam ban ker sainar shiah kaba ladep pynbeit da ka Sorkar Kmie lyngba ka Parliament kata naduh ka Muktapur haduh Jaliakhola.
Ha ka jingïathir ki nongrep kiba don ïa ki jaka rep sha ki bynta khappud kila dawa la kumno kumno dei ban ker sainar shiah beit na Zero Line khnang ba ki jaka rep jong ki kim ym long kiba sepei ynda la dep ka jingker sianar shiah.
U Dolloi jong ka Elaka Satpator u Ma Lakashiang ula pynshai ba ka jingïalang ha kane ka sngi ka la long kaba ïaid beit ïaid ryntih ha kaba kiba bun na ki nongrep ki la pynsngew ïa ki jingsngew jong ki halor kane ka jingpan NoC jong ki bor synshar District.
Hadien ka jingïalang u la pyntip ba ka jingïalang ka la rai ba ïa kane ka jingker sainar shiah yn ym pat lah ban ai NoC katba ym pat lah ban pynbeit ïa u pud u sam katkum ka jingdawa jong ki paidbah nongrep ka Elaka ha ki thaiñ Khappud.
U la pynsngew ba lada wan kane ka jingker sainar shiah la thikna ba kan ktah shibun eh ïa ki paidbah kiba leit rep shapoh kitei ki jaka ba jngai 150 yard na ka jingker sainar kin shem shitom ruh ha ka leit ka wan namar ka jingdon ki Entry bad Exit Gate bad kin hap ban mih ban rung katkum ka por ba la buh.
U Dolloi ula ïathuh ruh na ka por sha ka por kum ki nongrep kin hap beit ban ap ïa u kwai ha ka por ba la ih bha, khnang ban lait na ka jingshah tuh, da kaba u pynsngew ka jingdon kine ki Gate kan wanrah jingeh ïa ki nongrep bad ki lah ruh ban shah pyndik beit manla ka por.
Ïa ka jingïalang ha kane ka sngi la pynïaid da u Adviser ka Synjuk ki Waheh Shnong War Jaiñtia u u Ma Kolmen Pohshna ryngkat ka jingdonlang jong u Deputy Commissioner ka West Jaiñtia Hills District u Bah B.S. Sohliya, u Addl. Deputy Commissioner u Bah Mark Andrew Challam, u Dolloi ka Elaka Satpator u Ma Daman Lakashiang, ki nongrep ka thaiñ, ki nongïalam ka Co-Ordination Committee on International Border (CCIB) bad ki sengbhalang.

Leave A Reply

Your email address will not be published.