Jurip u MLA ba jur palat ka dheng kali ha Motphran

0

Shillong, Nailur, 30: U MLA jong ka North Shillong Constituency u Bah Adelbert Nongrum ha ka sngi Palei u la ïalam ïa ki heh Pulit Traffic ka East Khasi Hills District na ka bynta ban sorjamin ïa ka jingdheng kali ha ka thaiñ Motphran kaba long ka kad khaii kaba heh bad kaba ju thnem da ki nongleit nongwan bad ki nongdie nongthied manla ka sngi.
Ha kane ka jingsorjamin ïa ka jylli pyllun kaba dei ruh ka lad ban rung sha shnong Mission kaba dei ka pdeng jaka ba ju pynïeng bad pynhiar ïa ki nongshong kali ha Motphran la sakhi lang da u Additional Superintendent of Police (Traffic) Bah Ian Onel Swer bad u 2nd Incharge Traffic ka Lumdiengjri Police Station u Arjun Chetri.
Watla kum u MLA kam da dei satia ban mih sha surok ban pynbeit ïa ka jingïaid kali namarba ka dei ka kamram jong ki Pulit, hynrei da ka jingsngewkhia ïa ka jingud jingnam jong kiba bun um banse ban ïakren pynbeit na ka bynta ka bha ka miat jong baroh lang.
U la ong ba ka por kaba jur bha ka dheng kali ha kane ka jaka ka ju long naduh ka por 8:00 baje mynstep haduh 11:00 baje mynstep bad 5:00baje janmied haduh 7:00 baje janmiet.
“Ka daw ka long ba ki briew ruh ki ju ap kali na kane ka jaka bad kumjuh ruh kiba kamai ñiah kali ruh ki ïeng laiñ ap ha kane ka jaka kat haduh ba ka la ktah shibun. Kumta ngi la rai, ba kum ka jingpyrshang, ha kane ka jaka naduh mynta ka sngi ka tnat Traffic kan pynmih hukum ba naduh 8:00 baje mynstep haduh 11:00 baje mynstep bad 5:00 baje janmied haduh 7:00 baje janmiet yn ym shah ban ïeng ap nongshong kali ne pynhap nongshong kali bad ha mar syndah ka jaka ïeng jong ki Auto Mawlai bad yn shah ïa ki Taxi tang ban pynhiar ïa ki nongshong kali bad yn ym shah ïeng kali ap briew bad yn sa aidak ruh da u line ïa ka jaka pynhiar ïa ki nongshong kali,” ong u MLA.
U la kyrpad ruh ïa ki paidbah bad ki nongñiah kali kamai ba kim dei ban shna jingeh hi dalade ïalade hynrei ban ïatreilang ban ap kali na ki jaka badei bad kiba ñiah kali ruh kin ïeng na ka jaka badei ban pyrkhat lang ïa kiwei ym tang na ka bynta ka bha shimet.
“Na kane ka surok ki briew kiba wan na kylleng ki shnong wat naduh ki thaiñ Mawïong, Mawlai, khamtam kiba hap hapoh ka Constituency ki ïaid ban leit sha District Council, sha Khyndailad bad kiwei ki jaka kumta donkam bha ïa ka jingïatreilang jong baroh khnang ba kan ym jur palat ka dheng kali ha ka bynta jong ka Motphran,” u la ong.
U la ong ruh ba ki Pulit Traffic kin pyntreikam shwa shi por ïa kane ka rukom pynïaid kali ba thymmai da kaba buh por ïa mynta shipor bad lada kam don ka jingïatreilang jong baroh yn shim ka rai ban ym shah pynïeng ne kyntiew nongshong kali shyrta ha katei ka jaka bad lada lap ba don pat kiba dang saitlah ki pulit kidei ban shaiñ ne daiñ kuna katkum ki kyndon aiñ.
“Wat lada dei u MLA ne uno uno u heh Sorkar shisien ba la pynkheiñ ïa ki kyndon aiñ pynïaid kali ne u long ka daw ka jingdheng kali dei ban shaiñ kuna,” ong u Bah Adelbert.
U la pynpaw ruh ba ka jingjur ka dheng kali ka dei na jylli ba ju ïeng kali kamai ban leit sha shnong Mission bad kumta khnang ba kan don ka jingïoh ïaid laitluid yn ailad shwa ha ki ar tylli ki por kaba mut naduh 8:00 haduh 11:00 baje mynstep namar ki por long skul, 5:00 baje janmiet haduh 7:00 baje janmiet ka tnat Traffic kam dei ban shah pynhiar ne kyntiew ia ki nongshong kali namar ka jaka ka dei ban long laitluid pura khnang ba kan ym don ka jingdheng kali.

Leave A Reply

Your email address will not be published.