Ngi don ka jingkitkhlieh kum ki nongmih khmat khnang ba ka hok kan ïeng : Charles
Da ka lyer ka jingkylla pynlong ki samla pule TMC

Shillong, Nailur 30 : U President jongka All India Trinamool Congress (AITC) u bah Charles Pyrngrope mynta ka sngi haba kren ha ka prorkam “ Ka Lyer jongka jingkylla ne ka Wind of Change” jongki samla pule ka TMC u la ong ba kum ki nongmihkhmat paidbah kiba shakri ïa ki paidbah donkam ban don ka jingkitkhlieh khnang ba ka hok kan neh bad ïeng rarong.
U la kyntu ruh ïaki samla pule ba kin don ka jingkitkhlieh ban tei ïa ka imlang ka sahlang.
U la ai nuksa ruh ïa ka Bhutan ba ka dei ka ri kaba pynmih tdem duna eh bad kane ka long namar ba ki kwah ban pynneh pynsah ïa ka mariang na ka bynta ka pateng ban dang wan. Ha kane ka sngi Ba Ar jongkane ka prokram Wind of Change la pynlong da ki jingïakob rwai bad ïakob pyni riam pyni beit.
Ki samla pule ki la pynpaw ïa ki sap rwai jongki da ki jingrwai pop, hip-hop, country bad rwai Hindi ruh. Ha ka jingïakob pyni riam pat ki samla pule ki la pyni ïa ki jingriam ryngkat ka khubor ban wanrah ïaka jingkylla.
Ha kane ka prokram la wan ban ïashim bynta da ki samla pule na St Edmund, Lady Keane, St Anthony’s, Shillong College bad kiwei kiwei ki college.
Lashai ka sngi ki samla pule kin ïoh ban ïashim bynta ban kylli jingkylli bad ïakren markhmat bad u nongïalam ka liang pyrshah u Dr Mukul Sangma bad u Chief Whip ka Liang Pyrshah u bah George B Lyngdoh.