Dawa ka AITC ban ai tohkit biang ha ka IIT Rourkee halor ka jingkhyllem u Dome

Shillong, Nailur, 30: Ka All India Trinamool Congress (AITC) ha ka sngi Thohdieng ka la dawa ba dei ban ai tohkit biang ha ka Indian Institute of Technology (IIT) Rourkee halor ka jingkhyllem ka tnum pyllun jong ka Ingdorbar Thawaiñ ba thymmai ka Jylla ha Mawdiangdiang.
Ka AITC kaba shong ha ka Liang Pyrshah ka la kdew ruh ba donkam ban tih bniah halor ka jingkynnoh ïasylla hapdeng ka Sorkar Meghalaya Democratic Alliance (MDA) bad ki ar tylli ki Contractors ba kynthup ïa ka UPRNNL bad ka Badri Rai & Co.
Katkum ka jingsngew jong ka AITC, ka rai jong ka Sorkar ban bynshet ïa ka jingtohkit ha ka IIT-Guwahati ha ka jaka jong ka of IIT Rourkee ban tohkit ïa ka jingkhyllem jong ka tnum pyllun ka paw shai ba ka dei ka jingïada ïa ki Contractor – UPRNNL bad ka Badri Rai & Co ban buhrieh jar jar ïa ki jingshisha khlem da pynshitom ïa kine ki ar tylli ki Kontraktor ba ïohkam.
Ha ka kyrwoh na u National Spoke Person jong ka AITC u Saket Gokhale u la ong ba katba nagngmih ki sngi ki kam bamsap bad ki kam be-aiñ jong ka sorkar MDA ki la nangpaw pyrthei ha kaba ïadei bad ka jingtei ïa ka Ïing Dorbar ba thymmai wat la na ka liang jong ka ka la pyrshang dohïap dohim ban tap eit miaw ïa ki.
“Namarkata, ban sei pyrthei ïa ki kam be-aiñ bad ki kam bamsap jong kane ka sorkar, ngi dawa ba ka IIT-Rourkee ne kino kino ki kynhun tohkit laitluid kiba ym don jingïadei ne kino kino ki jingïatreilang bad ka UPRNNL ne ka Badri Rai & Co.) kin pynlong biang ïa ka jingtohkit biang halor ka jingkhyllem ka tnum pyllun jong ka Assembly” u ;la ong bad dawa ruh ba ka sorkar kan pynshitom bad blacklist marmar ïa ka contract na bynta ban tei ïa ka Ïing Dorbar ba thymmai bad ba dei ruh ban khot da ka tender ba thymmai.
U la ong shuh ba “ka jingtohkit laitluid ban peit pyrman da ka iing kashari dei ban sdang noh ban lap ïa ka jingïasylla hapdeng ka sorkar MDA bad kine ki kontraktor namar wat la na ka liang jong ki ki la pynkheiñ ïa baroh ki kyndon hynrei na ka liang ka sorkar MDA ka pyrshang ban ïada ïa ki”
U Gokhale u la ong ruh ba kine ki jinglap ba dang shu ïoh kin kynton ban pynskhem ïa ka jingkynnoh ka jong u ba ka don ka jingïasylla hapdemng ka sorkar MDA bad ki katto katne kontrak kiba ïadei jingmut bad ka sorkar kiba ïoh ruh ban pyntrei ïa kiba bun bah ki jingtei heh dor jong ka sorkar.
U la ong ruh ba kane ka jingïasylla hapdeng ka sorkar bad ki kontraktor ka pynlong ïa ka jylla ban duh nong da ki bun bun klur tyngka.
Shuh shuh u la ong ba ha ka jaka ban ai dak ïong (blacklisted) ïa ki kontraktor kiba pyntrei ïa kane ka tnum pyllun ba la khyllem (bad namar ka jingaikam pateng sha ka Kompeni Badri Rai & Co. kaba la shah kyntait), ka Sorkar Meghalaya ka la rai ban ailad ïa kine ki Kontraktor tang ban shu shna biang ïa kane ka tnum pyllun khlem kano kano ka jingsiew na ka Sorkar.
Ha u Nailar, ka IIT-Guwahati ka la aiti ïa ka kaiphod tohkit sha ka Sorkar Meghalaya. Ha kane ka kaiphod ka IIT-Guwahati ka la kdew ba ka jingkhyllem jong kane ka tnum pyllun ka dei na ka daw ka jingbym ïatreilang hapdeng ki Designers bad ki Contractor.