Bthah ka ïingbishar ban sei lut ïa ki jingshisha halor ka bamsap thied kali ha ka tnad Pulit
Ki Scam ba shyrkhei bah dei ki jingtohkit bym ju lap dien

Shillong, Nailur 30 : Ka ïing bishar High Court jongka jylla ka la bthah ïa u Secretary ba dei peit ïa ka tnad kam pohïing ban ai jubab kiei ki lad ki lynti kiba la shim na ka bynta kito kiba donkti ha ka kam bamsap thied kali bad pyndonkam kali , la ka don ne em ka jingpyrshang ban kurup ïa ki jingdon jingem jongki ban ïoh biang ïa ka pisa .
ïa kane ka jubab dei ban pynpoi sha ka ïing bishar shwa ka 17 tarik Risaw, ong ka hukum na ka ïing bishar ba la shong bishar da u Chief Justice Sanjib Banerjee bad Justice W.Diengdoh hadien ba la shong bishar ïa ka mukotduma PIL ba la ujor da ki nong shong shnong jongkane ka nongbah kynthup ïa u Riewad Vicharwant Warjri halor ka jingthied ïa ki kali da ka tnad pulit.
Kine ki nongujor ki la pynpaw ba ki don bunjait ki kali ba la thied da ka tnad pulit naduh u snem 2019 khlem da ïoh jingmynjur ïa ka jingmang pisa na ki bor ba dei peit. La thied 29 tylli ki kali bad la pyndonkam ruh tang da u Assistant Inspector General (Administration) jong ka jylla Meghalaya.
La pynpaw wat la ki mih ki jingpyrshah hadien ba la sei madan ïa kane ka kam bamsap bad la thung ruh ïaka jingtohkit hynrei ka don lehse ka jingpyrshang ban buhrieh ïa kane ka kam bamsap bad kaba sniew tam ka long ba ym pat shym la don kano kano ka jingpyrshang ban leh ei ei ïa uba donkti bad khamtam kumno ban ïoh biang ïa katei ka pisa ba la pyndonkam bakla.
Ka sorkar ka la ïathuh ba ka jingtohkit ka dang ïaid shakhmat halor kane ka kam. La pynpaw ruh ba yn lah ban pynngat kyndon ïa u ne kiba donkti hynrei dei tad hadien ba la lap ksai bad ki sabut kiba biang halor kane ka kam ba lah ban pynngat kyndon ia u. Na kata ka daw kam long ban leh kyrkieh ei ei ia mynta.
Haba ka ïing bishar ka la kylli hato la shim khia ei ei ban pynthikna ba kito kiba donkti kim dei ban shah pynkynriah kam shawei ne ban shah ban pynkynriah ïaki jingdon jingem jongki, la jubab ba dei tad hadien ba la ïoh ïa ki sabut kiba biang halor kane ka kam lah ban shim ki lad ki lynti kumno ban ïoh kurup biang ïa ka pisa kaba la pyndonkam bakla.
Ka ïing bishar ka la pynpaw, kaba sngewdiaw ka long ba ka kam bamsap ne scam kam kut tang ha ka scam hynrei kaba shyrkhei tam ka dei ka scam jongka jingtohkit namar ka ju jia ba da ki synduk synduk ki kot la pyndonkam ban buhrieh ïaki jinghisha bad teng khat eh ba shah pynngat kyndon kiba donkti ne kumno ban ïoh kurup biang ïa ka pisa ba la pyndonkam bakla. Kumta ka ïing bishar ka kyrmen ba ha kane ka jingjia kan ym ïaid da kata ka juh ka lynti.