Ba wan bun ki jingkylla na ki kam surok ha Ri Bhoi, ai jingïaroh ki Contractor ka Ri Bhoi ïa ka Dhar Construction Company

Nongpoh, Jylliew 27: Da kaba bishar bniah halor ki kam ba la wan rah da ka Dhar Construction Private Limited Company, kum kawei na ka Company ba mih na ka jylla, ka All Ri Bhoi Government Contractor & Suppliers Association mynta ka sngi ka la ai ka jingkhublei bad ka jingïaroh kaba khraw halor ki kam ba rad bah ba la leh da kane ka Company ban wan rah kata ka jingkylla ha Ri Bhoi District.
Haba ïa kren bad ki lad pathi khubor mynta ka sngi ha Nongpoh, u Presidet ka All Ri Bhoi Government Contractors & Suppliers Association, u Bah F.M Mawphnaing bad u General Secretary, u Bah Doris Sulein, ki la ong ba kum ki Contractor bad ki supplier na Ri Bhoi District ki dap da ka mynsiem ka jingsarong ban mih bluit kane ka Company trai muluk trai jaka, kaba la lah ban wan rah shibun ki jingkylla ha ka jylla khamtam ki kam ba radbah ba la leh da kane ka Company ha Ri Bhoi District.
Kitei ki nongïalam ki la pynpaw ruh da kaba ong, ha ki por ba la leit noh hapoh ka jylla Meghalaya haba pyntrei ïa kano kano ka kam la ka dei ha ki kam surok bad ki kam tei jingtei la wan ban pyntrei da ki Company kiba na shabar ka jylla, hynrei naduh ba la mih kane ka Dhar Construction Company kiba bun ki kam la trei da kane ka Company kaba long ka sarong bad ka burom ym tang ïa ki bor pynïaid katei ka Company, hynrei ka burom ka leit ruh sha ka jylla hi baroh kawei ba wat ki trai jylla mynta ki la ïa kot bor ban leh ïa kiba bun ki kam kiba ha ki por ba mynshuwa niar ban lah ban trei da ki briew lajong bad ha kine ki sngi lyngba ka jingdon katei ka Company ba bun ki kam pynroi la trei lyngba kane ka Company kaba ai jingmyntoi ruh ïa ki paidbah ka jylla.
Haba ïa kren bad ka surok, kitei ki nongïalam ki la pynpaw ba tang ha Ri Bhoi ki surok ba la trei da ka Dhar Construction Company ka dei ka surok na Mairang -Patharkhmah sha Rani, ka surok na Umling sha Umrit, ka surok Killing sha Umsen, ka surok na Liarbang sha Umkhen, ka surok na Umsning sha Sohnidan bad dei tang kane ka Company kaba la lah ban trei ïa kine ki kam kiba heh kiba bun na ki trai muluk kim pat kor bor bad nalor kata ki Contractor ba dang rit bor ruh ki ioh kam lang haba pyntrei ïa kitei ki kam pynroi.
Na ka liang kitei ki nongïalam ki la pynpaw ruh ba ki sngew sarong shisha ban don kane ka Company trai muluk trai jaka ha kaba bun hi na ki kam pynroi la trei lyngba kane ka Company bad haba ïa nujor bad ki por ba leit noh lada ki kam pynroi kiba la kot da ki spah ne hajar klur la hap ban wan da ki Company ba na shabar bada mynta pat da ka jingdon kane ka Company ka ai jingmyntoi shibun eh ïa ki paidbah ha ka jylla bad khamtam ruh nalor ka jingwan ka roi ka par bad kiba bun ki samla ne ki rangbah kiba ym donkam don jam ki ioh ruh ban bsuh khlieh lang ban ïa trei ïa ki kam barit ba ria ban pynim jakpoh ïa ka ing ka sem jongki, ong kitei ki nongïalam.