Shillong, Nailar 11: U Nongïalam seng bhalang barim bad u kyrtong ka Congress na Mawlai u Bah Marbud Dkhar ha ka sngi Palei u la leit ban pan jingpynshai na ka Assistant Commissioner jong ka FSSAI halor ka hukum ba la pynmih ban tah ïit ïong kaba 50% ïa ki dukan die doh kiba don ha kylleng ki surok shnong khnang ban nym ïohi shuh ïa ka doh da ki nongleit nongwan .
Haba kren sha ki lad pathai khubor, hadien ka jingïakynduh bad ka Asst Commissioner Kong DBS Mukhim, u Bah Marbud u la ong ba ka jingbuh ïit kan pynlong pynban ïa ki nongsiew nongpet ban jynjar namar kim ïohi shuh ïa ka doh la ka bha ne sniew ha shuwa ban thied.
U Bah Marbud u la buh jingkylli balei ba shu pynlamwir tang ïa ki nongdie doh, u la ong ba ka FSSAI lada ka ïaleh ban wanrah ïa ka jingkhuid jingsuba jong ki mar bam, kadei ban leit peit lem ruh ïa ka khuid ka suba jong ki dukan die sha ‘dairy’ kiba shong da ki bym dei Khasi.
U la kynnoh ruh ba kane kadei namar ka kynhun Gau Gyann Foundation ka la ai da ka PIL pyrshah halor ka rukom die doh ha ka jylla da kaba ki la kdew ba ka isait met palat.
Haba ïakren pat bad ka Asst commissioner ka la ong ba ka daw kaba pynlong ïa ki ban bthah ïa ka jingtap ïit ïong ka long khnang ba kan nym paw madan eh, bad ruh ban wanrah ïa ka jingitynnad bad ka jingkhuid, bad namar ka jingbthah katkum ka High Court. Ka la ong ba kane ka jingtah ïit ïong kan treikam lang ha kylleng la jylla.
Ka la pynshai ba ka jingthmu ba phah tap ïit ïong ka long ba nym ïohi pyrshah eh ïa ka doh, “Lada ki nongthied doh ki kwah ban ïohi ïa ka doh hashuwa ban thied te ki lah ban shu phah pyni shuwa,”
Haba kylli, ka la ong ba ka don ka aiñ lada pynkheiñ pat ïa ki jingbthah, shuh shuh ha kaba ïadei bad ki dukan die sha ‘dairy’ ka la ong ba kine ki dukan ki la pynkheiñ ïa shibun tylli ki kyndon kumta ka la bthah ïa ki ruh ba kin pynkhuid bha ïa ki dukan bam ha shuwa ba kin plie.
