Ba shah leh bym suidñiew ha ki nongïalam ka UDP rai u bah Bindo ban kyrshan pura ïa ka EC ka NPP

Shillong, Nohprah 18 : U Bah Bindo M Lanong MDC ba la shu sieh da u Lat ha KHADC u la pyntip ba la shai ka sngi un ai da ka jingthoh sha u CEM jong ka KHADC u bah Pyniaid Sing Syiem na ka bynta ban ai ïa ka jingkyrshan ba pura ia kane ka EC jong ka NPP hapoh ka jingïalam jongu namar u la ngiah shoiñ ïa ka jingshah leh bym suidñiew ha ki nongïalam ka UDP.
U Bah Bindo u la kren shai ba ïa ka kyrteng jong u la phah sha u Lat ka jylla ban thung kum u MDC shuh sieh ha KHADC ha ka por jong u Dr. Donkupar Roy (bam kwai ha dwar U Blei) bad ba pynneh ïa u ha kane ka shuki MDC kam dei ka UDP.
U la pynkynmaw ba ha kane ka MLA kaba la dep u la ïa khun na Nongkrem kum u kyrtong shimet ka daw ka long ba ka party ka ai tiket ïa u briew bym dei jong ka party, ka party UDP ka la kyntait ban ai tiket ïa u kum u briew jong ka party dei na kane ka daw ba u hap ban ïa khun kum u kyrtong shimet.
Mar ïadep ka elekhson u la ïathuh ba u la thoh sha ka party ban ïa klet noh ïa kaei kaba la jia bad u la thoh ïa ka shithi ban pan tiket MP hynrei ka party kam shym la jubab haduh ba un da toh hi da lade ba un weng noh ïa kane ka jingpan tiket.
La ong ba wat ha ka General Council Meeting ruh ka party UDP ka khlem pyntip shuh sha u bad u khlem leit hi, ruh la kynthoh ba ka jingtlot ki seng riewlum dei ka jingbym burom ïa ki nongïalam barim jong ka party.
U la ong ba naduh u snem 1972 haduh mymta u khlem kylla jutang ïa ka nongrim kaba u don, ka jingkylla dei tang ka kyrteng jong ki party, ha u snem 1972 ka don ka APHLC, hadien ka mih ka HPU bad mynta UDP, ka mynsiem ka don bad ki seng riewlum hynrei mynta u la laitluid un ai ka jingkyrshan ïa ka EC jong ka NPP ha KHADC.