Dang don ki Shnong kiba shahniah ïa ka koit ka khiah na ka ri Bangladesh
Sha Bangladesh 3000 lah dap, ha jylla la jong 5000 tang ka bai kali
Shillong, Nohprah 19: Ka long kaba ym sngewlah ngeit ba ki dang don ki shnong ha Meghalaya kiba haduh mynta ki dang shaniah ha ka ri Bangladesh na ka bynta ka koit ka khiah jong ki. Kine ki shnong wat lada ki don ha khappud bad ka Bangladeshm hynrei kidei pat kiba ym da don jngai eh na ka National Highway.
Ki katto katne ki shnong kiba dang shaniah tylli ha ka Bangladesh na ka bynta ka koit ka khiah ki long ka Huroim, ka Hingaria, Lahaleiñ, Leijri bad kiwei kiwei ki shnong ba marjan.
U nongaikhubor dang shen u la poi sha kitei ki shnong bad ïaid na ka surok kaba ïaid na Sonapur, East Jaiñtia Hills District sha Huroi, kaba ka jingjngai na Sonapur sha Huroi kam don wat tang 20 Kilometer ruh.
Ki nongshongshnong kitei ki Shnong ki ïathuh ba haba ki pang ki shitom ki kham suk ban leit sha Banladesh. Ka daw ka long ba ka surok kaba kin na Sopnapur sha Huroi ka sniew palat bad wat ha ka por tlang ruh ka surok ka ktieh twa bad ki kali rit kim lait ban ïaid, lait noh ki Bolero Pick Up bad ki kali kiba don Four Wheel.
Ki la ïathuh ba lada ki wan shaduh Khliehriat kaba don ka CHC bad kiwei ki jaka sumar ki hap lut palat 5000 tyngka tang ka bai kali bad sa ka bai dawai bad bai bai peit Doktor ym tip shuh katno kan poi. Hynrei lada leit sha Bangladesh pat, tang 3000 tyngka la dap lut bad bai dawai bad bai kali.
Nalorkata kine ki Shnong haduh mynta kim pat don satia wat tang ka bor ding elektrik bad ki shu pyndonkam da ki Solar kiba ïarap ïa ki khyndiat khynsoit. Nalorkata ka Mobile Networok ruh ym don satia.
Ki briew hangne ki im ha ka rep kwai bad rep tynpew bad kidei ki briew kiba ïashong lang bad kiwei pat ki para Khasi Khara kiba wan na ki thaiñ Pynursla, Amlarem bad kiwei kiwei de ki jaka.
Ban kit ïa u kwai ki hap wai da ki trok rit ne da ki pick up trok namar ba kali barit kim lait satia.