Delhi, Nohprah 18: Haduh 45 ngut ki MP jong ka Rabya Sabha ki la shah sospon ha kane ka dorbar tlang ba mynta, ïathuh ki lad pathai khubor na Delhi.
Ka daw ba kine ki 45 ngut ki la shah sospon kadei namar ba ki la pynthut palat ïa ka jingïashong dorbar. Na kine ki 45 ngut, 34 ngut ki la shah sospon na ka bynta ka jingïashong dorbar kaba dang sah, 11 ngut kiwei pat ki la shah sospon bad ki dang ap ïa ka report jong ka Privileges Committee, ha kaba ka jingshah sospon jong ki kan btang tad haduh ba ka Committee kan da ai ïa ka report jong ka.
Napdeng kine kiba shah sospon ki kynthup ïa ki MP kiba dei ki nongïalam ba kham hakhmat jong ka Seng Congress bad kine ki long u Jairam Ramesh, u Randep Surjewala, u KC Venugopal.
Haba ai jingkren ha kane ka ïingdorbar, u Shongknor jong ka Dorbar, u Jagdeep Dhankar, u la ong, “Nga kyrpad ïa ki dkhot ba kin leh don akor bad bud beit bud ryntih ïa ki kyndon pynïaid kam jong ka ïingdorbar. Wat leh kum ki nongpynkulmar shnong”.
Na ka liang kiba shah sospon, ki la pynpaw ka jingsngewdom ïa kane ka jingleh jong ka Shongknor ka ïingdorbar, da kaba ong ba ka jingthmu jong kane ka ïingdorbar ka long ban set ïa ka shyntur ne ban khanglad ïa kaei kaba ki kwah ban pynpaw na ka bynta u paidbah. “Ka jingthmu jong kane ka ïingdorbar ka long beit ban khang ïa ka sur jong ki liang pyrshah bad ban khanglad ïa ki ba kin rah hakhmat ka ïingdorbar ïa ki jingeh jong ki paidbah”, la ong u KC Venugopal.
Hynrei na ka liang u nongïalam jong ka ïingdorbar, u Piyush Goyal, u la kynnoh ba ki Liang Pyrshah ki la ibeiñ bad kren kum bym suidñiew ïa u Shongknor jong ka ïingdorbar.
