Ba lap bym don jingïadei bad ka jingkhlad u khynnah skul, la shah biang ban pyndonkam ïa ka ‘Sting’

Shillong, Nailar 17: Ka Commissionerate of Food Safety, Meghalaya ka la wengnoh ïa ka jingkhang ba shipor halor ka jingdie pynïaid ïew, ka jingbuh bad ka jingsam ïa ka umsoh ‘Sting’ energy drink, hadien ba ka jingtohkit la shem ba kam don ka jingïasoh bad ka umsoh bad ka jingkhlad jong u khynnah skul.
Lah ban ong ba kane ka jingkhang ban die bad pynïaid ïew ïa kane ka umsoh la pynjari ha ka 14 tarik mynta u bnai, hadien ka kaiphod kaba la kynnoh ba ka don ka jingïadei bad ka jingkhlad jong u khynnah skul hadien ba u la dih ïa kane ka umsoh.
U Commissioner of Food Safety u Dr. Joram Beda u la ong ba kane ka jingpyrkhing la wengnoh halor ka nongrim jong ka kaiphod jingtohkit kaba la aiti ha ka 14 tarik mynta u bnai da Food Safety Officer na Tura. Ka kaiphod tohkit kam shym don kano kano ka jingïadei hapdeng ka jingdih ïa kane ka umsoh ‘Sting’ energy drink bad ka jingkhlad jong u khynnah skul.
Ha ka hukum ba la pynmih ha ka 15 tarik mynta u bnai, u Dr. Beda ula ong ba ka jingkhang ba shipor kaba la pynmih mynshwa la wengnoh bad kane kan treikam noh mardor.
Ka ophis Commissionerate ka la pynshai bad ka jingweng ka ïadei tang bad ka kaiphod jong ka jingjia bad ym dei ban shim kum ka jingshem ne ka jingai syrnot kaba kyrpang ne ka jingmynjur ïa kano kano ka tiar ba la shna ne pynmih bad uba pynmih ne ba shna.
Ka la bynrap ruh ba baroh kiba die ïa ki marbam ki dei ban trei ïa ki kam da kaba bud ïa ka Food Safety and Standards Act, 2006, bad ka jingjurip, ka jingshim ïa ki nongmuna bad kiwei ki kam kin bteng na ka bynta baroh ki marbam hapoh ka jylla.