La kylluid ki lynti ïaidkjat ha ka thaiñ Laitumkhrah hadien ba la kynriah ïa kiba shongdie madan

Shillong, Nailar 17: Ka MLA jong ka Laitumkhrah Malki Constituency ka Dr. Ampareeen Lyngdoh ka la pynpaw ka jingkmen ba ka jingap kaba la shisnem shiteng ban ïoh pynkynriah ïa kiba dei madan ha ka thaiñ Laitumkhrah ka la urlong ha ka sngi Nyngkong, watla kam kwah ban kynthoh eiei halor kane, hynrei ka la shu ai khublei ïa ki nongshong shnong halor ka jinglah ban pynkynriah ïa kiba die madan ha kane ka thaiñ.
Katba u Chief Executive Officer (CEO) ka Shillong Municipal Board u P K Boro u la ïathuh ba baroh kiba shongdie madan ha ka thaiñ Laitumkhrah ki la mynjur ba kin leit shong noh ha ki artylli ki jaka ba la pynkhreh kawei kadei ha Barik point ka Brightwell Bungalow bad kawei ha Dhankheti ka jaka ba ju pynieng kali.
Haba kren sha ki lad pathai khubor ha ka step jong ka Sngi nyngkong kaba dei ka Sngi kaba khatduh ka jingai por ïa baroh kiba die madan ba kin kynriah noh sha ki jaka ba la buh u CEO u la ïathuh ba baroh kiba die madan ki la mynjur ban leit sha ki jaka ba la dep shna kyrpang da ka sorkar jylla.
Lah ban ong ba ki nongtrei ka Shillong Municipal Board ki la sdang ban pynkynriah bad kumjuh ruh ban pynpra noh ïa ki dukan ba la tei da kiba die madan naduh ka step jong ka Sngi nyngkong bad la ïohi ruh ba ki nongshong shnong, ki nongïalam shnong, watla kim treh ban kren sha ki lad pathai khubor, ki la ïa shong beit triang ha Police Point Laitumkhrah khnang ba kane ka jingpynkynriah ïa kiba shongdie madan kan long kaba seisoh bad kaba lait na ki huri hura.
Lah ban ong ba ka Shillong Municipal Board (SMB) ha ka sngi Nyngkong ka la pynkynriah noh ïa ki nongshong dukan madan kiba don hapoh 100 ngut na Laitumkhrah sha ki jaka ba la ithuh kyrpang ha ka jaka ïeng kali Dhankheti bad ha Brightwell Bunglow ha Barik, bad kane ka dei kum shi bynta ban pynlait ïa ka jingkhapngiah jong ki lynti ïaid kjat bad ki rud surok ha ka nongbah Shillong.
Kane ka jingpynkynriah la pynlong hadien ba la pynbna paidbah bad ha ryngkat ka jingïatreilang bad ki nongdie madan.
Na ka liang ka SMB ka la leh ia kane ka jingpynkynriah da kaba ai por ïa ki nongdie jingdie madan ban pynkhreh ban kynriah noh shawei.
Ka SMB ïa kane ka sienjam, la shim ban pynlong ïa ki surok bad ki lynti ïaid kjat ha Laitumkhrah kiba kham khuid bad kham pynsuk ïa ki nongleit nongwan hadien ba la ïohi ïa ki nongdie jingdie madan ki shong die jingdie ha ki jaka paidbah.
Haba phai pat sha ka jingpyrshah ïa ki nongdie jingdie madan ha Jail Road, u CEO u la pyntip ba ïa katei ka jaka bad ïa ki jingeh jong ki yn sa ïa kren biang hadien.
U Boro u la pyntip ruh ba ka Sorkar ka dang ai jingïarap pisa sha baroh ki nongdie jingdie madan kiba shah ktah na ka jingshah pynkynriah sha kiwei ki jaka, khnang ba kan long ka jingïarap na ka bynta jong ki.
Lah ban ong ha kane ka sngi na ka liang kiba die madan ki la kohnguh beit ïa ki bor jong ka Shillong Municipal Board bad kane ka jingpynkynriah ka la long kaba jop khlem da la don satia kiba ïaleh pyrshah.