Nongstoiñ, Nailar 17: Ka Deputy Commissioner jong ka West Khasi Hills District, ka Hema Nayak IAS, ka la kyntu ïa ki samla pule bad ki samla wad kam ban shim ïa ka kabu bad ban wan sha ka Skills Meghalaya Recruitment Drive 2026, kaba la pynlong da ka Meghalaya State Skill Development Society (MSSDS) ha ki bynta bapher jong ka district.
Kane ka Recruitment Drive kan long ha kylleng ki bynta jong ka District bad kan sdang naduh ka 19 tarik Nailar ha Shallang C&RD Block Shallang Dorbar Hall, 20 Nailar 2026 Ri Muliang C&RD Block Tynghor Dorbar Hall, 21 Nailar 2026 Rambrai C&RD Block Rambrai Dorbar Hall, 25 Nailar 2026 Nongstoiñ C&RD Block Nongstoiñ Dorbar Hall, 28 Nailar 2026 Mawshynrut C&RD Block Riangdo Dorbar Hall
Ki samla kiba la pyndep ïa ka jingpule naduh Class VIII pass shaneng ki lah ban wan sha kane ka Recruitment Drive ban register bad wad ïa ki lad kam kiba ïadei bad ka sap bad jingnang jingstad jong ki. La kyntu ruh ïa ki nongwan ban wanrah lypa ïa ki kot ki sla kiba donkam.
Ha kane ka Recruitment Drive, yn don bun jait ki lad kam ha ki liang bapher bapher, kynthup ïa Healthcare and Nursing, Construction and Skilled Trades, Hospitality/Hotel and Food Services, Wellness, Spa and Beauty, Drivers and Transport, Manufacturing and Production, Automotive and Mechanical bad kiwei kiwei de.
Ki nongwad kam ki lah ban register offline ha ki jaka ba la buh ban pynlong ïa ka Recruitment Drive, lane ha ki Ophis BDO kiba don hajan tam jong ki.
Nalor nangta, ka Deputy Commissioner ka la kyntu ïa baroh ki samla kiba biang ïa ki kyrdan jingpule ban pyndonkam hok ïa kane ka kabu, ban wan shim bynta bad ban wad ïa ki lad kam kiba lah ban ïarap ïa ki ban tei ïa ka lawei jong ki.
