Ba lait kali tang ha ka por ba rang, kordit ki paidbah ka Lumtongseng bad Sakhri

“Ki longkmie ba armet bad ki khunlung kim ju ïoh ban leit injek ha ka Lyiur”

0

Khliehriat ïaïong 17 : Ki paidbah nongshong shnong jong ka shnong Lumtongseng bad Sakhri, East Jaiñtia Hills District, ki ïa kynduh jingeh ha kiba bun ki liang, kawei kaba pyn kordit eh ïa ki ka dei namar ka jingbym lait ki kali ban poi shaduh shnong, kane ka jingbym lait ïaid ki kali ka dei namar ba ym don ka surok bad ka lynti syngkien kaba bit ba biang bad kumjuh ruh ka jingbym don ka jingkieng ha ka wah Umtalen, ha ka por lyiur ba dap um ki kali kim lait ban ïaid sha shiang ka wah bad kiba bun ki bynta jong ka surok ruh ki julor, ki jot bad ki twa.
U Mawphor, ha ka jingleit jurip kaba dang shen, u la lap ba ka surok ban ïaid sha Lumtongseng bad sha Sakhri ka dang dei ka surok khyndew bad wat ha ka por ba rang ba rkhiang ka bneng ruh, kiba bun ki bynta jong ka surok ki la julor bad twa, kumjuh ruh ka kali ka hap ban ngam na um ban lait sha shiliang ban poi sha kitei ki shnong, shisha kane ka jingym biang ka surok ka wanrah jingeh ïa ki paidbah ha ka kit ka bah, khamtam ban pyn poi ïa kiba pang ba shitom sha ki jaka sumar, kumjuh ruh ban pyn poi ïa ki mar rep sha ki jaka ïew.
Haba ïakren bad u Secretary ka shnong Sakhri, u bah Enos Sdor, u la ïathuh ba na ka daw ka jingbym lait surok ka la ktah ruh wat ïa kito ki longkmie kiba ar met bad ki khyllung kiba donkam ban leit ai injek man ka por, u la ong ba ki longkmie ba ar met bad ki khyllung ki ïoh ban leit shim ïa ki injek tang ha ka por ba rang ba rkhiang ka bneng, katba ha ka por lyiur ba jur slap kim lah ban leit shim ïa ki injek, watla ki hap ban pyndep ïa ki injek bapher bapher ruh kumba la bthah da ki doctor.
Kawei ruh kaba sngewphylla ban tip ba ki paidbah nongshong shnong jong kitei ki ar tylli ki shnong, ki ju lup thup lypa ïa ki mar bam mar dih ha ka por ba rang ba rkhiang ka bneng namar ha ka por lyiur ba jur slap kim ju lah ban pyn kit ïa ki mar bam mar dih sha ki shnong namar ba ym don ki kali ki ba ïaid ha ka por slap, ki ïathuh ruh ba ki kali ki ju lah ban ïaid tang ha ki khyndiat bnai eh, kata tang ha ki por ba rang ba rkhiang ka bneng.
Ym tang katta, la sngewthuh ruh ba ki paidbah ki kynduh jingeh bha wat ban ioh ïa ki dawai dashin, namar kine ki shnong ki hap hapoh ka Public Health Centre ha Lumshnong, ka jaka ka ba jngai bha na shnong jong ki bad ki kynduh jingeh ruh ha ka leit ka wan ban poi sha PHC na ka daw ka jingbym don ki lynti ki syngkien kiba bit ba biang.
Ha kaba ïadei bad ki dawai, dashin, u Waheh Shnong jong ka shnong Sakhri, u bah Nildis Tongper u la ai ka jingkhublei ïa ka company Star Cement bad ong “Dei ka Company Star Cement ka ju wanrah ïa ki dawai bad ai dawai ïa ki khynnah, ki khyllung, ki rangbah, ka la ai ruh ïa ki sniang, ki blang ba ngin ri bad ka ai ruh ka lad ba ngin shah hikai (training) kumno ban ri jingri”
Ha kaba ïadei bad ka leit ka wan u bah Enos Sundor u la ong ba “Ha kato ka por ba dang don i bah E.Kharmalki, kum u Deputy Commissioner ka East Jaiñtia Hills District, i la wan ban jurip ban jngoh ïa ka jaka ha ka wah Umtalen, ha kato ka por ki la wan bad ai ka jingkyrmen ïa ngi ba yn sa pynïoh noh ban shna jingkieng ha katei ka jaka, hynrei naduh katei ka por haduh mynta ym pat shym la don kano kano ka jingsei soh, kumta kane ka la pynlyngngoh ïa ngi kum ki nongshong shnong, kumta ngi buh ka jingkyrpad ïa ka sorkar ba kan kynmaw lem ïa ngi kum ki nongshong shnong ban sngewbha ban shna jingkieng ha katei ka wah Umtalen, namar ha ka por lyiur ba jur slap ngi shem jingeh bha ha ka leit ka wan”
U bah Sdor, u la ïathuh ruh ba ha ka por ba don kiba pang ba shitom ha shong ha thaw, baroh ki rangbah ki hap ban pep ïa ki jingtrei jingktah bad ki hap shong sngi, namar ki hap ban ïa kit ïa u/ka nongpang da ka met bad kiew ïa ki jaka ba long riat, ban dup lah ban pynpoi ïa u/ka nongpang sha surok national highway, Sonapur ha kaba ka kali ka ap lypa ha surok national highway ban pynpoi ïa ki nongpang sha ki jaka ai jingsumar kum sha Khliehriat CHC, sha Lumshnong PHC bad sha Jowai bad lada dei ba ki nongpang ki shu leit shim dawai, ki briew shnong ki hap ban ap ha surok national highway Sonapur haduh ka por janmiet bad kit biang pat ïa kiba pang sha shnong, la ong ruh ba ka shimpor haduh shi kynta haduh shi kynta tam ban kit ïa kiba pang ba shitom.
Kum ban shu bynrap, ka jingleit jurip ki bor district jong ka East Jaiñtia Hills District, ïa ka jaka ban shna jingkieng ha Umtalen, ka surok ban leit sha Lumtonseng bad sah Sakhri ka dei naduh u bnai rymphang jong u snem 2021 ha kaba la kular ruh ban shna noh ïa ka jingkieng ha ka wah Umtalen, hynrei sngewlyngngoh pat ba kane ka jingthmu imat ka la shu jah rngai noh, lah ban kynthoh ba ki bor district ki la shu leh klet ïa kane, ha kaba khlem don shuh kano kano ka jingbud dien na ka liang ki bor district.
Ka long kaba shisha ruh ba ka jingbym biang ki surok, ki lynti syngkieng ka buh jingeh ïa ki paidbah nongshong shnong jong kitei ki shnong kiba don hapoh ka elaka Narpuh, hooid, ka don kawei ka jingkieng (hanging bridge) ha ka wah Lukha, kaba ki ju ïaid kjat ban poi sha surok national highway, hynrei ha ka por lyiur haba dap um ka wah Lukha ka um ka ju tap bad shlei shaduh katei ka jingkieng ïaid kjat, kumta ki paidbah ki don lynti shuh watla ki pyrshang ban ïaid da ka kjat ne da ka kali ruh ha ki por lyiur ba jur slap.

Leave A Reply

Your email address will not be published.