Shillong, Ïaiong 17 : U National President jong ka NPP, Conrad K Sangma ha ka sngi Nyngkong u la ong ba kam pat don satia kano kano ka rai halor ka jingïakren bad ka People’s Democratic Front ban wan ïasoh noh sha ka NPP.
“Ka jingïakren ka dang ïaid mynta shakhmat bad kumba nga ong, kam pat don satia kano kano ka rai kaba khatduh. Kumta ngin ïai ap shwa bad ban peit ynda la poi ka por,” ong u Conrad haba kren bad ki lad pathai khubor.
Kumba long mynta, ka PDF ka don arngut ki MLA, kata u MLA ka Mawkynrew, Bah Banteidor Lyngdoh bad u MLA ka Sohra, Bah Gavin Mylliem.
Lada katei ka jingïakren ka seisoh, ka NPP kan kiew ka jingbun paid sha ka 28ngut na ka Iing kaba don 59ngut. Bad lada ka jop lei lei sa na Sohiong kan poi sha ka 29 ngut.
Kumban shu pynkynmaw, dang shen u Bah Banteidor Lyngdoh uba dei ruh u Working President ka PDF u la kubur ba ka jingïakren ka dang ïaid mynta shakhmat hynrei u ong pat ba kin sa shim ia ka rai ha ka por kaba biang.
La mih ruh ka jingïakren bad ka jingwan pynïasoh jong ka PDF sha ka NPP ka lah ban long ha shwa ka jingthep vote ha Sohiong, kata ha shwa ka 10tarik u Jymmang.
Hynrei halor kane, naka liang u Bah Banteidor u la pynpaw ba um pat lah satia ban ong ei ei namar ka rai hi kam dei satia kaba u lah ban shim tang marwei.
Kumba long mynta nalor ka NPP bad PDF, kiwei pat ki party kiba trei lang bad ka NPP ha ka sorkar synrop MDA 2.0 ki kynthup ïa ka UDP kaba don 11 ngut, BJP bad HSPDP mar arngut bad ruh arngut ki MLA shimet.
