Shillong, Ïaiong 17 : U Myntri Rangbah ka Jylla, Conrad K Sangma ha ka sngi Nyngkong u la ong ba ki lah ban ïa kynduh mynta ka taiew ban ïa kren halor ka jingpyntreikam ïa ka Roster System.
“Mynta ka taiew hi, ngin sa don ïa ka jingkynduhlang jong ka sorkar bad kan shimpor katto katne ïa ngi ban bishar bniah ïa baroh ki jingthoh, ki kot ki sla bad ki hukum jong ka Iing Kashari, nangta ka jingpynshai kaba bniah bad baroh kiba donkam,” ong u Myntri Rangbah haba kren bad ki lad pathai khubor.
U ong ruh ba hadien ba la dep ban ïa syllok hapoh ka sorkar, ïa kane ka jingïakren lah ruh ban ïakren lang wat bad ki seng saiñpyrthei bad ruh ki riewpaidbah.
“Kumta hadien ba ngi la ïoh ban lum lang ïa baroh, ngin sa shongpyrkhat pat kumno ba ngin ïaid shakhmat ïa ka kam,” bynrap biang u Myntri Rangbah.
Da kaba kam ba kane ka ishu kadei kaba khluit, u Myntri Rangbah u la ong ruh ba ki donkam ban peit bad bishar bniah ha baroh ki liang. “Ngi donkam ban peit ruh ïa ki hukum jong ka Kashari bad ruh kiwei ki ishu kiba don. Kumta hadien ba ngi la dep ban peit ïa kitei baroh bad hadien ba ngi la dep syllok bad ki paidbah, ngin sa lah ban shim pat ïa ka rai.”
Haba jubab pat halor ka jingdawa jong ka VPP ban bishar bniah biang ïa ka state reservation policy, u Myntri Rangbah u la ong ba baroh ki don ïa la ka jong ka jingai jingmut bad kumta kim don ei ei ban ong ïa kata namar kadei ka riti synshar laitluid bad kumta kano kano ka jingpynpaw ruh kadei kaba donkam.
U ong ruh ba kum ka sorkar kin sa leh sani bha halor kane ka mat bad kin sa shim pat ïa ka rai kumno ban jam shakhmat.
