Shillong, Jylliew 27 : Ki samla ïalehkai Sqay ka jylla ki la ïoh ban khur ar tylli ki takma rupa na ka 24th National Sqay Championship kaba long naduh ka 23 haduh ka 26tarik mynta u bnai ha Kurushetra, Haryana.
Katkum ka kyrwoh na ka General Secretary ka AMSA, Kong Sumarlin Mary Warjri la ïathuh ba kitei ki arngut kiba khur takma ki kynthup ïa ka Espiranza Stela Songthiang ha ka thup kiba 50 kilo katba u Salmi Phawa ha ka thup kiba 48 kilo.
Ki la don haduh 7 ngut ki nongïalehkai kiba leit ban aireng ha katei ka lympung hapoh ka lama jong ka All Meghalaya Sqay Association kaba la wan ban aireng haduh 29 tylli ki jylla jong ka ri India.
Ha ka kyrwoh, la pynkynmaw ruh ba ka Sqay kaba dei kawei na ki jingïalehkai martial arts ka la ïoh ban rung ha ka thup jong ka National Games kaban sa long ha Goa ryngkat bad san tylli kiwei ki jait jingïalehkai ba thymmai.
“Katei ka championship ba la kdew haneng kadei ba la pynlong da ka Sqay Federation of India ban jied ïa ki kynhun na kylleng ka ri India ban ïoh shim bynta ha ka 37th National Games kabn long ha Goa ha u Risaw 2023. Ka jylla ka la ïoh ruh ïa ka lad ban leit shim bynta ha katei ka 37 National Games ka ban sa long ha Goa bad kumta ka kyntu ïa ka tnad Sports bad MSOA ban pynrung noh ïa ka Sqay Martial Arts kum kawei na ki jait jingïalehkai ba la dep ïoh jingithuh na ka Indian Olympic Association ha ka Meghalaya kaban sa long shen ha Tura mynta u snem,” ong ka kyrwoh.
Ha kajuh ka por ka kynhun ka dawa ruh naki bor bahlor ba kin mang jingïarap pisa lang khnang ba ka AMSA kan ïoh ban pynlong ïa ki coaching camp ryngkat ban pynbiang ïa ki tiar ki tar bad ruh ka bam na bynta ki nongïalehkai kum ka jingpynkhreh na bynta katei ka National Games.
