Sangsot ban peit ïa ki nongleit nongwan kiba hap ban ïaid lyngba ka nongbah Shillong khamtam eh naduh ki thaiñ Umshyrpi ter ter, nangta na ki thaiñ Nongthymmai, Khyndai Lad, Polo, Jaïaw, Mawkhar, naduh ka por 8 baje mynstep ter ter haduh 10 baje bad ha ka por janmiet pat naduh 1baje ter ter haduh saw baje ei ei, namar ka jingjur palat ka dheng kali. Ban shu peit ki riew paidbah ym lah satia ban tip nangno katei ka dheng kali ka sdang khamtam eh haba naduh ki thaiñ Barik ter ter haduh Dhanketi bad Laitumkhrah ba ki kali ki la shu ieng beit hajuh tang shu poi kitei ki por.
Teng teng i synei ban peit ïa ki pulit pynïaid kali, ki bapli ki la shu phuh syep hi puk tangba ki hylla bad kynhied ïa kito ki kali tamsneng kiba watla ki ïohi ba ka la blok lypa hynrei ki dang leit ban tynruh kaba long ka daw ba nang syrtad arshah ka jingdheng kali. Kaba kham i sangsot ka long ba poi haduh u pud ba wat ki heh pulit ruh ki hap ban mih lang ban pynïaid kali kumba la ju ïohi ha Barik Point man ka por, kaba dei ka pdengbah jong ka dheng kali ha ka nongbah. Khlem artatien, ki pulit ki don la ka jong ka jingai jingmut na ka bynta katei ka jingeh kaba ki kynduh kaba pynktha khlieh bad pynsniew mynsiem ïa ki tang shu poi kita ki kynta.
Ban shu peit hi, ïa katei ka dheng kali lah ban pynduna ym ban pynduh, tang lada ka sorkar ka don ka jingkitkhlieh ban bthah ïa baroh ki bor pynïaid skul ba kidei ban buh beit da ki school bus, khamtam eh kito ki skul kiba don ha pdeng jong ka nongbah. Jin lada baroh ki skul kiba don ha kitei ki jaka ba ka ïaid ka ieng jong ki briew ka la bun, ki buh da ki school bus, lehse ka jingdheng kali ka la duna namar la kumno kumno kawei ka bus kan kit ym duna ïa ka 40 haduh 50 ngut ki khynnah katba lada ki wan da ki kali lajong, lehse ka jingdon jong ki khynnah ka la ïa ryngkat bad ka jingdon ki kali. Kumta lada shu kheiñ, lada kawei kawei ka skul ka don kumba 800 ngut ki khynnah skul kamut kin don beit ym duna ïa ka 500 ne 600 tylli ki kali rit kiba la ieng laiñ lypa ha shi lynter ka surok ba don kito ki skul naduh ka por ba ki wan buh haduh ka por ba ki wan shaw skul.
La ju ïohi ba ka surok kali naduh Barik ter ter haduh Laitumkhrah kadei ka surok ka ba don beit ka dheng kali. Kumta ka shong mynta ha ka jingstad jong ka sorkar ban tehlakam, namar ban pynheh ïa ka surok ym donlad shuh hynrei kadei beit sa tang ban pyndonkam da ka jabieng ban pynduna ïa ka dheng kali, lym kumta ki jingeh ki la nang ïai mih bad ka dheng kali kan kham nang jur shuh shuh.
Ka la dei ruh ka por ba ki bor pynïaid skul kim dei ban ap ïa ka sorkar namar bunsien hi ki polisi treikam jong ka sorkar kidei kiba suki, kumta donkam ïa ki ban leit ai jingmut ïa ki ophisar lane beit beit sha u Myntri Rangbah ne Myntri ba dei peit ïa ka tnad pule puthi ne Transport khnang ba ka kam kan ïaid kham stet.
Kam myntoi ïa ki nonghikai lane khynnah skul ban khñium, ban kynthoh ïa ki pulit pynïaid kali lane ïano ïano lada kim tip ïa ka daw tynrai baroh halor ka jingdheng kali. Ki bor pynïaid skul ki la dei ruh ban kyndit bynriew naduh mynta namar katei ka dheng kali kan poi haduh u pud ba ki khynnah skul ki la hap ban mih lypa ar kynta shwa ka por, lada dei ha ka por ba long eksam. Ym tang katta, kane kan ktah ruh ïa ka por haba ki leit phai sha iing.
Ka por ka dang biang, tangba ka shong ha ka sorkar bad ki bor pynïaid skul la ki sngew ïahap neem ban pyndonkam noh da ki school bus bad ban ym ailad shuh ïa ki kali shimet ban leit shaw bad wanbuh man ka sngi.
