Nongstoiñ, Nailur, 07: Namar ka jingbym pat don ïa ka surok kaba bha na Mawdet haduh shnong Mainop kaba jngai kumba saw kilomitar tam, ki paitbah jong katei ka thaiñ da ka jingsngewkhia ki la pynlut por haduh ar ngi ban maramot ïa ka surok ha kane ka taiew, wat la ka dei tang ka surok ba la shna da ki nongkhaïi dieng ha ki snem ba mynshuwa.
Ki rangbah jong katei ka thaiñ haba pyntip ha u nongthoh khubor ki la ong ba ha kitei ki ar sngi ki la trei shitom met bad mynsiem, hynrei na ka daw jong ka jingbym lah pynbiang ïa ki maw ban thep ha ki thliew ki syar bad ki jaka kiba la ktieh palat, kim shym la lah ban pyndep haduh ban da poi sha ka shnong Mainop.
Nalor kata ki la ong ruh ba ha kitei ki ar sngi ki la pynlut ruh da ka pisa ban phah kit maw ha ki Mahindra pickup, tangba na ka jingbym don ki par maw harud jong ka surok baroh shilynter ki la shem shitom haduh katta katta. Kumta ki hap ban maramot ruh tang da ka khyndew suda, kaba lada hap slap ka surok ka nang kham ktieh shuh shuh.
Kitei ki rangbah ki la ong ruh ba na mar ka jingjynjar ha ka leit ka wan, ki la ïakut ban pynlut por biang sa ar sngi ban maramot haduh ban da poi ha ka shnong Mainop. Ha kitei ki ar sngi ki la ïakut ban ïamih haduh saw shnong bad kin pyrshang ban wad ïa ki jaka ba ïoh pahuh ki maw na ka bynta ban thep ha ki thliew jong ka surok tang ban lah ïaid da ki Mahindra pickup bad ki jeep.
Ki la ong ruh ba ki don katto katne ki bynta ba ki surok ba la pyntrei na ka skhim shispah sngi, hynrei namar ka jingbym pat siang maw, ka um slap ka khlong lut ïa ka khyndew bad shilynter ka surok ka don tang ki thliew suda. Ha ka por lyiur haba ki longkmie ki leit jingleit da ki Mahindra pickup ha ki jaka ba ki sahkut, kim banse ban hiar bad khynñiat lem ïa ka kali bad ki rangbah tang ban lait na ka jingsahkut.
