Shillong, Nailur 7 : U Myntri ka sorkar jylla uba dei peit ia ka tnad pule puthi u Rakkam A Sangma u la kob ba ka NPP kan jop na baroh ar ki Parliamentary Constituency hangne ha jylla kata na Shillong bad Tura ha kane ka MP election Lok Sabha ka ban long ha u 2024.
“ Ka NPP kan ïakhun ïa kane ka MP election na baroh ar ki constituency bad ngi kyrmen ba ha kane ka kynti ngin jop na baroh ar kata na ka Shillong bad Tura Parliamentary Constituency. Khamtam nangne na Shillong ki paidbah ki dei ban sei da u MP uba tbit ban ïasaid bad ïatai hapoh ïing Dorbar Lok Sabha.
Ha kaba ïadei bad ka jingjia ha Manipur, u Rakkam u la ong “ Nga da sngew duh nong shisha ba ngi la duh noh ïa u nongïalam u P.A Sangma namar ngi donkam ïa u briew uba kum ma u ban kren hapoh ka Parliament na ka bynta kane ka thaiñ shatei lam mihngi namar u dei da shisha u nongïalam uba tbit bad uba la ïoh ka jingithuh ym tang hapoh ka ri hynrei ha kylleng ka pyrthei” .
Haba kren shaphang u MP ka Congress mynta nangne na Shillong u ma Vincent H Pala u Rakkam u la ong ba u ma Pala u la dei ban leh bad kren shibun kiei kiei hapoh ka ïing Dorbar Lok Sabha na ka bynta ka jingmyntoi ki paidbah ka jylla hynrei wat la katta ruh ka dang donkam hi ïa u ban dang ïai pyntbit shuh shuh.
“ Ngan long u briew uba kmen eh lada u MP u la leh ei ei, ïasaid bad ïatai hapoh ïing dorbar u la dei ban mih bujli ha ka jaka jong u PA Sangma namar u la jop bun sien hynrei tang teng khat eh la ju ïoh sngew ba u kren. Ka ri lum Khasi bad Jaintia ka don bun ki briew kiba tbit bad kumta ki paidbah ki dei ban jied noh da uba tbit khnang ba kan long ka jingsarong ïa ka jylla” ong u Rakkam.
U la ïathuh ruh ba shen ka NPP kan sa pynbna ïa u kyrtong jongka na kane ka Shillong Parliamentary Constituency. Hynrei na Tura u la ïathuh ba ha kane ka kynti ruh ka NPP kan pynïakhun biang da ka MP ba mynta ka Agatha K Sangma bad khlem pep kan jop suk na kane ka constituency.
“ Na ka bynta ka Tura ka NPP kan jop suk. Nalor kata hangne ha kane ka thaiñ shatei lam mihngi ruh kan kiew wat la ka dang dei ka seng sain pyrthei kaba dang 12 snem ruh. Na Tura ka jingjop don burom jongka kyrtong ka NPP kan long halor ka nongrim na na ki 24 ngut ki MLA ka NPP ka jop 18 ngut bad nalor kata wat ki Independent ruh ki ïatrei lang bad ka NPP kumta ngim don jingar tatien ba ka NPP kan jop biang ha kane ka kynti” pynkut u Rakkam.
