All India Arm Wrestling C’ship: Lahduh u Dipankar Mech na ki shynrang, ka Yogesh Choudhury na ki kynthei
Shillong, Nohprah 21: Ka Bouncer Association of Meghalaya ka la pynkut noh ïa ka Shillong Arm Fight 2023, All India Arm Wrestling Championship ha U Soso Tham Auditorium. Ha kane ka championship kaba ar sngi lynter la sakhi ïa ka jingwan shimbynta ki nongïalehkai na kylleng ka Ri.
Kumban shu pynkynmaw ïa kane ka Championship la pynlong da ka People’s Federation of Arm Wrestling India ha ka jingïatreilang bad ka BAM bad ruh ka Treilang Welfare Society ryngkat ka jingkyshan na ka tnat Sports and Youth Affairs jong ka Sorkar Jylla.
Ha kane ka sngi la wan sakhilang da u Myntri Rangbah ka Jylla-u Conrad K. Sangma. “Ha kine ki san snem ba ladep, ngi la pyrshang na ka liang jong ngi ban ïarap kyntiew ïa ka Sports bad ruh ïa ki jingtei kiba ïaid ryngkat bad ka Sports. Ngi la ïoh ban pdiang pynlong ïa ki rynsan ïalehkai bapher bapher kum ka Grandmaster Chess Tournament, kaba la pynkut hynnin ka Sngi,” la ong u Myntri Rangbah.
“Ka All India National Boxing Championship, All India Table Tennis Championship ki dei kiwei pat ki lympung kiba la pynlong ha Shillong. Ka long kaei kaei kaba sngewsarong ban ïohi ïa ka Jylla ba ka la kylla long ka jaka pdeng na bynta ka Sports,” u la bynrap.
Ha ka men’s category u Dipankar Mech na Assam, u la ïoh khur ïa ka nam champion of champions, katba ha ka women’s category la khur da ka Yogesh Choudhury na Haryana.
Ha kane ka Championship la ïoh ruh ban pynïakhun ïa kiba don jingduna ha ki dkhot met (Sitting category) ha kaba u Hubert L Nonglait u la wan ba nyngkong, Graham Jones Kharbani ba ar, bud sa u Name Nangsan Kupar K Warjri ha ka kyrdan ba lai; ha ka standing category u Johnborlang Pyngrope, Nihi Lamare bad u Marelad Kanai ki la khur ïa ka jingjop.
Kiba jop na ki shynrang, Daniel Nongkhlaw, Hubert Paliar bad u Banshanlang Terang ha ka 55 Kg category. Nilay Sankar , Razedul Ali bad Revel Born Star Snaitang na ka 65 Kg; Deepankar Mech, Jackson Lyngdoh bad Alexion Roy Mylliem Umlong na ka 75 Kg; Tridip Medhi, Alan S Marbaniang & Kishore Chettri na ka 85 Kg; Bakham Maian Khongwir, Banbatjuban Khingwir bad Ishan Kashyap na ka 85+ Kg.
Na ki kynthei : Angelis Kharumnuid, Airikmen Shabong bad Milartita Lyngdoh Nongbri na ka 50 Kg;Bandarika Kharkongor, Senebi Syngkli bad Angel Mary Mylliem Umlong na ka 55 Kg; Wandalin Syiemiong, Payal Bhommik bad Olivia Dkhar na ka 60 Kg; Margareth Pathaw, Aiboklin Rina bad Yimri Jagoi na ka 65 Kg; Yogesh Chaudhury, Soram Rani bad Ribasuk Lyngdoh Mawphlang na ka 65+ Kg Categoy.