Myriaw, Nohprah 21: Ka Nongriat Sports Club, ka la ïoh rah ïa ka nam lahduh ha ka Myriaw Knock Out Football Tournament 2023 ba la pynlong da ka Myriaw Cultural and Sports Club, da kaba pylliem ïa ka Mawkhan United da 4 la 2 Kol lyngba ka Tie Breaker.
Ha ka jingïalehkai phainal kaba la pynlong ha ka Madan Mawlum, Myriaw ba la sakhi da ki hajar ngut ki nongpeitkai, ka Mawkhan United ka la ioh thep nyngkong tang mar ïasdang ka kylla step.
Ka jingïalehkai ka long mar ba ïabiang bor bha hapdeng kine ki artylli ki team, wat lada ka Mawkhan ka kham tam ka rukom ïalehkai ha ka kylla step.
Hynrei ha ka kylla miet, ka Nongriat kaba khambun ki nongkyrshan ha kane ka jingïakhun, ka la ïakhun doh ïap ban ïoh pynïakhaid, hynrei ka jingtbit ki defend line ka Mawkhan, ka la khanglad bunsien ïa ki.
Dei tad ynda la sah khyndiat minit shuwa ban wai ba ka Nongriat ka la ïoh pynïakhaid. Shaw la risa ki nongkyrshan ka Nongriat kiba la ïashad ïakmen tad haduh ban da poi ha ka tie breaker, ha kaba u nongap kol ka Nongriat, u la ïoh ban khanglad haduh lai tylli ki penalty kick bad pynjop ïa ka team jong u da 4 la 2.
Ka Nongriat ka la ïoh ïa ka Trophy bad ka pisa 1 lak tyngka. Katba ka Mawkhan ka la ïoh da ka Trophy bad ka Pisa 50 hajar tyngka.
U Kongsan ha kane ka sngi udei u Bah P. Sohkhlet, Sordar ka Shnong Kynshi Mawria bad sam ruh ia ki Prais ha ryngkat ka jingïadon lang u Sordar ka Shnong Myriaw, u Bah K. Syiem, u Sordar barim, u Bah Kyrmen, u President ka Sports Club, u Samla K. Syiem, u General Secretary ka Sports Club, u Samla G. Hoojon bad kiwei kiwei de ki nongkitkam ka Sports Club. Ha kane ka jingïalehkai phainal ka Sports Club ka la pynkup burom ruh ïa ki lai ngut ki nongpeitkai kiba la tymmen bad kiba smat bha ban wan ai jingkyrshan man ba long ki jingïalehkai.
