Aiti ka Council sha ka COLKS ban pynïaid ïa ka KTMI, T. 6 lak yn siew bai shim wai, ong u CEM
Shillong Naitung 10: Ka jingtei ïa ka Khasi Traditional Medicine Institute (KTMI) ka la dep, ïathuh u CEM ka KHADC u Bah Pynïaid Sing Syiem hapoh ka Dorbar Lyuir ka KHADC ha ka sngi Balang, bad ïa kane u la jubab ïa ka jingkylli ba la wanrah da u MDC ka Nongpoh u Bah Balajied Rani ïa ka jinglong jingman kane ka jaka pule bad jaka ai jinghikai kaba don ha u Lum Sohpetbneng kaba dei ka nongkynti jong ka KHADC.
U MDC Nongpoh u la pan jingshai ruh halor kane ka jaka ai jinghikai ba kaei ka kam ba ka la leh, la ki jingtrei kam jong ka kila ïaid ne em bad la don ne em ki nonghikai, halor kane u CEM u la ong ba kane ka projek kadei kaba la sahteng la slem bha hynrei mynta la lah ban pyndep.
“Kaba sah mynta kadei satang ka jingtan bording na shabar, ka jingbuh ïa u Transformer, ka Water tank kaba lah ban pynlang bad store um kumba 1. 50 hajar litar bad ïa kane la pynlut kumba T. 40 lak. Katba ka pisa kumba T. 26.70 lak lah dep siew sha ka MeECL bad kaba sah ka long ban wan buh noh ïa u transformer,” u la ong.
Halor ka jingtreikam kane ka jaka ai jinghikai u CEM u la ïathuh ba kumba ka long mynta ha kane ka institute ki don tang u Chairman, Secretary bad 4 ngut ki nongtrei bad ka kam kaba ki leh ka long ban pdiang ïa ki application na ki nongsumar kiba kwah ïa ka Certification of Recognition lyngba ka Khasi Hills Traditional Medicine Act bad kumba ka long mynta la palat 100 ngut la ithuh ïa ki nongsumar Khasi.
U la pyntip ruh ba ka EC ka la khot tender ban shim wai ïa ki 3 tylli ki firm bad na kitei lyngba ki presentation ba ki la pyni, la lap ba tang kawei kaba biang nadong shadong bad kane kadei ka Centre of Learning Knowledge and Services (COLKS) bad kaba sah ka long satang ban pyndep ïa ka jingïateh kular khnang ba ka EC kan ïoh ban pyntyllun ïa ka kam.
U la ïathuh ba ha kane ka jaka ai jinghikai ka Council ka donkam la ka jong ka Laboratory ban shna dawai bad ka rukom song dawai kaba bha bad kane ka Firm ka la mynjur ban siew T. 6 lak sha ka KHADC ka bai wai shisnem bad kane kan ïarap ban kyntiew ïa ka khajna ka Council kaba long kaba donkam bha mynta.