Ai Tablet ka ophis DM&HO ïa ki ASHA ban ka East Jaiñtia Hills District ban pynstet ïa ki jingtreikam

Khliehriat, Nailur, 06: Ka tnat ka koit ka khiah lyngba ka ophis jong u District Mediacal & Health Officer East Jaiñtia Hills District, mynta ka sngi ka la pynlong ïa ka prokram ba kyrpang ha Conference Hall ha ophis u Deputy Commissioner ha Khliehriat ha kaba la sam da ki Tablets sha baroh ki Asha bad la khmihlynti ba lyngba ki tablet kan iarap ban pynsuk bad pynkloi ïa ki kam ki jam jong ki Asha ha kaba iadei bad ka koit ka khiah jong ki paidbah bad kane ka long ruh kum ka jingpynkup burom ïa ki Asha kiba treikam hapoh East Jaiñtia Hills District.
Haba kren kum ka kongsan ka MLA jong ka Sutnga-Saipung Constituency, ka kong Santa Mary Shylla, ka la ai ka jingiaroh ïa ka jingtreikam ki Asha kiba ju trei shitom met bad mynsiem ban kyntiew ïa ka koit ka khiah jong ki paidbah khamtam ha ki thaiñ nongkyndong.
Ka kong Santa.M.Shylla ka kyntu ïa ki Asha ba kin pyndonkam bha ïa kine ki tablet ba kan wanrah jingmyntoi ïa ki paidbah, ka la kren ruh shaphang ka Chief Minister’s Mothers Scheme (CMMS) bad ong ba kane ka skim ka iarap bha ïa ki paidbah khamtam ki longkmie kiba kha khyllung bad ong ba lada ki paidbah ki kynduh jingeh ki sngewbha ban pyntip sha ka tnat ka koit ka khiah ne sha ophis u Deputy Commissioner lane sha ka kum ka nongmihkhmat khamtam kino kino ki kam ba kyrkieh kiba iadei bad ka koit ka khiah bad ong ruh ban ialeh katba lah ban phnduna ïa ka jingkha khyllung ki longkmie ha ïing ha sem bad ki dei ban leit kha beit sha ki hospital ne ki jaka ai jingsumar, ka kyntu ruh ïa ki Asha ba kin ai ki jingtip ne jingpynshai sha ki paidbah halor ki lad ai jingiarap kiba wan na ka sorkar khamtam na ka bynta ki longkmie ba ar met.
Ha kaba iadei bad ka jingioh tablet, ka kongsan ka kyntu ïa ki Asha ba ki dei ban sumar bha ban nym ailad ruh ba kin ialehkai ki khun ha ïing bad ruh ba kin pyrshang ban tip kumno ban treikam da ki tablets namar lada ki pyrshang kin tip beit bad ha kane ka tablet ki lah ban buh jingthoh ne pynpoi ïa ki kaiphot sha ka tnat ka koit ka khiah ha kaba kim donkam shuh ban thoh ha ki bui (register)
Ka ai khublei kyrpang ïa ki Asha kiba don ha ki Sub Centre bapher bapher ha ki shnong ba kyndong, khamtam kumba la paw ha ki pathai khubor ba ki la don ki Asha kiba na shnong Thuruk Sub Centre, kaba don ha ka thaiñ Saipung ha kane ka shong ym don ka surok kaba bha hynrei ki Asha ki la shim khia bad ki la iaid da ka kjat ha jingjngai ka lynti bad pynkha khyllung ïa kawei ka longkmie, ka konsan ka la ai ka jingkitbok kitrwiang ïa baroh ki Asha ba kin nang lah ban trei bha shuh shuh ïa ki kam ban kyntiew ïa ka koit ka khiah ha ki shnong ki thaw.
U DSO I/C (IDSP) East Jaiñtia Hills District, u Dr Lucystar Sungoh, u la ong ba ki kam jong ki Asha ka long kum ki jingkieng kiba pun bad pyniasoh ïa ka tnat ka koit ka khiah lem bad ki paidbah ha ki shnong ki thaw “Lyngba ka jingtreishitom jong phi ki Asha, ki la don bun ki kam ba ka tnat ka koit ka khiah ka la lah ban leh ïa ki kam kiba bha ha ki shnong ki thaw khlem da peit shiliang khmat iano iano ruh, haba trei ïa ki kam ka donkam ruh ban wanrah ïa ka jingkylla bad kaba nyngkong ka dei ban pynrung ïa kum kine ki jingtreikam kiba da ki jingstad ka juk mynta ne ki technology, donkam ruh ban ai ki jinghikai ne training man ka por, te lyngba kine ki tablet ba la sam mynta ka sngi nga khmihlynti ba kin iarap shibun haba pynpoi ïa ki jingtip lada don kino kino ki jingjia ha shnong ha thaw ha kaba iadei bad ka jing pynkloi ban treikam na ka bynta ka koit ka khiah jong ki paidbah” ong u Dr Sungoh bad bynrap ruh ba nangne shakhmat ka tnat ka koit ka khiah kan pyrshang ban shna noh da ki vidio kiba iadei bad ka koit ka khiah ha kaba ki Asha kin dup lah ban pyni sha ki nongshong shnong.
Ka DIO, I/C East Jaiñtia Hills Disrict, ka Dr N.P.Suchiang ka la ai ka jingiaroh halor ka jingtreikam ki Asha ha ki shnong ki thaw bad kyntu ruh ïa ki paidbah ba kin shim ïa ka kabu ban pyndonkam ïa kino kino ki skim ba ai ka sorkar kum ka CMMS bad kiwei kiwei bad halor kane ka kyntu ïa ki Asha ba ki dei ban pynsngew ne pyntip sha ki paidbah kum ki nongrah khubor sha ki longïing longsnem ba ki paidbah kin dup tip shaphang ki skim ba wan na ka sorkar, ka Dr Suchiang ka la iathuh ruh ba ha East Jaiñtia Hills District ka don 210 ngut ki Asha.
Kiba la ia don ryngkat ha kane ka prokram, ki kynthup ruh u Deputy Commissioner East Jaiñtia Hills District, u Shivanh Awasthi, IAS, u Assistant Commissioner, u Shiv Malviya, IAS, ka ADC, ka kong J.U.Kharpuri, MCS, u District Mediacal & Health Officer East Jaiñtia Hills District, u Dr D.Shylla, u DMO District Malaria Officer, u Dr L.Marbaniang bad ïa ka prokram la pyniaid da ka DEIC Manager. RBSK, NHM East Jaiñtia Hills District, ka kong Daphihi Pasah.
Ïa ki tablet la sam da ka kongsan bad kitei ki heh sorkar sha baroh ki Asha kiba la wan sha kane ka prokram.