Nongstoiñ, Nailur, 06: Ka Hynñiewtrep Youths Council HYC Nongstoiñ Circle ha ka sngi Palei ka la ïoh kem biang ïa ki nongdih bad nongkhaïi drok napoh iew Nongstoiñ hadien ka jingïai buddien ïa kiba don bynta ha ka jingkhaïi bad dih ïa une u jait jingsniew ba la jyllei kylleng ki jaka.
U President ka Seng u samla Redyfernandy Sun President bad u samla Ïaiñehskhem Ryntathiang, ryngkat ka jingdonlang u samla Lumlang Kharsyiemlieh President ka HYC West Khasi Hills District Unit ryngkat bad ki dkhot ki la hiar kyndit ha them Iew Nongstoiñ ban khynra, ha kaba ka la lap kumba 25 ngut ei ei ki samla kiba dang ïa dih ha iew.
Ka seng ka la bat ïa ki bad ka la pyrshang ban sneng kyntu, nangta phah wan ïa ki bahaïing hasem ban ïa kren ïa kiba kwah sumar. Ka la maham ruh ban ym wan shuh hapoh iew namar ka pynsyier ïa ki paitbah bad nongshong iew.
U samla Redyfernandy Sun u la ong ba ka seng kan ïai bteng beit ban khynra bad kem naphang, khnang ban khang lad na ka jingkharoi jong une u jait jingsniew.
“Ngim kwah ba une u ksuid Drug un kharoi, na kata ka daw ngi mih ban kem ban maham ban sneng ïa ki. Ka seng ka pynrem ïa ka sorkar ruh namar katkum ka RTI, ka HYC Sengkmie la lap ba tang na West Khasi Hills la ïoh kurup haduh 9.2 kg ha ki 4 snem ei ei. Ka jingkylli ka long tip haei phi buh haba wat baroh ka Jylla la thang tang 1 kg, tang kiba ha West Khasi Hills ruh ym pat dep thang lut”, u la ong.
“Ka HYC ka buh jingkylli ïa ka Police Department ha West Khasi Hills District, namar ha ka joint meeting hapdeng ka HYC West Khasi Hills bad u DC lem bad SP ka West Khasi Hills, la ïa kut ban ïaid pahara lang man ka janmiet ban shngaiñ ki nongshong iew bad ki paitbah. Haei kata ka jingïakut bad balei phi leh klet,” u la ong.
