Shillong, Nailur 06: U nongïalam ka BJP bad u Myntri ka sorkar u Bah AL Hek ha ka sngi Thohdieng u la ong ba ki jingkynnoh kidei ban don ki sakhi kiba don ki jingkyshan kiba biang.
Ïa kane u la kynthoh halor ki jingkynnoh ba dangshen da u heh ka Congress u Bah Vincent H Pala pyrshah ïa ka party kaba synshar ïa ka sorkar ka National People’s Party (NPP) ba ka pyndonkam da ka pisa beaiñ ba la lum na u drok, u dewïong bad ki kam kontrak ban khring bad tan ïa ki MLA jong kiwei ki seng saiñ pyrthei.
Haba kren sha ki lad pathai khubor, u Bah Hek u la ong, “Ngam tip kaei kaba shisha bad namar kata ngam lah ban shu kren halor kane ka kam.”
“Ngim lah ban ong eiei ïa kaei kaba kiwei ki seng saiñ pyrthei ki ong haba ha la ïing la jong ngam lah ban ong eiei, kumno nga lah ban ong shaphang kiwei ki political party,” u la ong.
Na ka liang u Bah Hek u la ong ba lada don mano mano kiba pynmih ïa ki jingkynnoh kidei ban don sakhi kiba biang.
Haba kylli u nongïalam ka BJP u la ong ba ka party kan buh ki jingkylli ïa ka seng kaba synshar lada ka don kano kano.
“Lada don kano kano, tang ha kane ka por ngin sa kylli. Kumba long mynta ngim don eiei ban kylli. Ka long kaba suk ban kynnoh hynrei ban pynshisha ïa ka, ka long kaba eh,” u la ong.
Dangshen u National President ka NPP bad u Myntri Rangbah ka jylla u Conrad K Sangma u la ong ba kane ka jingkynnoh da ka Congress ka long pura ka bym don nongrim.
