Nongpoh, Nailar 23: Ki bor pynïaid jong ka skul Saiden Secondary School mynta ka sngi kila ai ka jingkitbok kit rwiang ïaka kynhun ïalehkai phutbol jong ka skul ha shuwa ba kin leit pyntbit sha Nongbah Shillong naka bynta ban leit mihkhmat ïaka jylla sha ka National Level Subroto Cup 2023 ka ban long ha nongbah Delhi.
Ha kane ka sngi la ïa donlang, da u Bah S. Pakyntein, Sub-Inspector ka Ri-Bhoi Police, u Bah EK Lapang, Rangbah Shnong ka Saiden bad ruh u Chairman ka Managing Committee jong ka Saiden Secondary school, u Bah Sumarlang Swer, Coach bad ki nonghikai bad kiwei kiwei.
Haba kren ha kane ka sngi, u Bah S. Pakyntein u la pynpaw ïa ka jingkmen kaba khraw ba katei ka kynhun ïalehkai phutbol jong ka skul Saiden kan ioh ban leit pyntbit shipor ha nongbah Shillong shuwa ba kin mih naka jylla ban leit shibynta ha katei ka lympung.
U la kyntu bad ai mynsiem ruh ïa kitei ki thei ïalehkai phutbol ba kin trei shitom ban pyntbit haka sap ïalehkai kaba ki don bad kyrmen skhem ba katei ka kynhun ka wanphai biang sha ka jylla da ka jingkmen bad ka jingjop.
U Bah EK Lapang pat kum u Rangbah Shnong u la ai ka jingkyntu ïaki thei ïalehkai ba kin pynleit jingmut haki jingshah hikai jong ki ba kin kohnguh sneng bad leh tipsngi haba ki mih nala iing ban leit pyntbit bad ban shim bynta ha katei ka lympung ialehkai ba heh haka ri bad kular ruh ban wad ki lad ki lynti ban pynioh jingïarap ïaki jingdonkam jong katei ka kynhun.
