Nongpoh, Nailar 28: Ka Ri-Bhoi Peoples’ Council (RBPC) sengkmie kala pynpaw ka jingsngew sarong bad ka jingkmen kaba khraw halor ka nam bad ka burom bala wanrah da ka kynhun ïalehkai phutbol ki Sub Junior U-15 ka jylla, bala mihkhmat da ka Nongjri Presbyterian Secondary School, Nongjri hadien ba katei ka kynhun kala rah ïaka nam lahduh haka phainal jong ka 63rd Edition Subroto Cup International Football Tournament 2024 kaba la long ha Bengaluru hadien ba kala lah ban pynliem noh ïaka jylla Uttar Pradesh da 3-0 kol.
Naka liang ka seng lyngba u Bah Jayson Lennox Nongrum kala ai ka jingkhublei ba kyrpang ïaki heprit U-15 ka jylla, kiba la lah ban lehkai bha naduh kaba sdang jong katei ka lympung bad ban rah syndon ïaka nam lahduh naduh ki coach kiba la ai ka jinghikai kaba bñiah sha kitei ki heprit ban poi sha ka thong jong katei ka lympung ïalehkai ba heh haka ri watla ka Ri-Bhoi District kam don satia ki madan ïalehkai ba biang.
Shuh shuh halor ka jingjop ka jylla Meghalaya bala mihkhmat ruh da ka skul na Ri-Bhoi naka liang ka seng ka kyntu ruh ïaka sorkar ba kadei ban shimkhia ban kyntiew ïaki kam ïalehkai haka jylla khamtam ban wanrah ki madan ïalehkai kiba biang ha ka them Ri-Bhoi ba ki khynnah kin ioh ban kilan ym tang haka phutbol hynrei kiwei kiwei ki jait jinglehkai kumba ka Ri-Bhoi District ka dei kawei naki district kaba ju pynmih ïaki rang bad thei ïalehkai ba paw haka jylla, u la bynrap.
