Jowai, Nailar 28: Ki dkhot bad ki nongkyrshan jong ka National People Party (NPP) 1-Nartiang Constituency kila pynremjur ïa ka jingkynthoh laplah ba khlem nongrim jong u M.P barim ka Shillong Parliamentary u ma Vincent H Pala pyrshah ïa u MLA ka thaiñ u ma Sniawbhalang Dhar u ba dei ruh u symbud myntri rangbah ka jylla, kaba lah pur sted ha ki lad pathai khubor ha kine ki khyndiat sngi.
La ong ruh ba ha ka video, ba la pynmih ha ki lad pathai khubor bapher bapher, la ïohi ba une u M.P barim u lah kynnoh pyrshah ïa u ma Sniawbhalang Dhar ba u dei u nongaiktien ka BJP bad kiwei de ki kam beaiñ. Kaba phylla ka long, kumno kat u M.P uba lah jop 3 sien kynthih um sngewthuh shuh ïa ka riti synshar paidbah bad kunmo party BJP kan thung nongaiktien da u MLA ka NPP, hato kane ka party BJP kam don dkhot shuh hapoh ka jylla? buh jingkylli ki paidbah.
Ha kawei pat ka jingkynnoh jong u ne u M.P barim ka jylla, ba u ma Sniawbhalang Dhar bad ka company jong u ki dei ki ba khaii beaiñ ïa u drok bad kiwei ki kam beaiñ, kane ka jingkynnoh ka la pynsngewsih shibun ïa ki kum ki nongshong shnong ka 1-Nartiang Constituency bad kila dawa ba u ma Vincent H Pala u dei ban panmap mardor lane pyni ïa ki sabut ki ba biang, ym ban shu padiah ïa u thylleij katba mon.
Kum kane ka jingkynnoh khlem nongrim ka dei ka jingibeiñ bad ka ba ktah matïong ïa ka burom ka ijot jong ka Constituency hi baroh kawei. Lada u shem ba u MLA jong ngi u leh ïa kita ki kam beaiñ balei um ujor sha ki bor jong ka aiñ, buh jingkylli ki paidbah naka 1-Nartiang Constituency.
Ha kine ki sngi baka thma pyrshah ïa u drok ka dei kaba lah ïaleh pyrshah da baroh ha ka imlang sahlang bad ki shnong ki thaw balei pat, u ma Vincent H Pala um ujor sha ki bor ka aiñ lada u tip tikna ïa kita ki ba khaïi drok, ne ïoh don eiei sha lyndet.
Lyngba kane ka kyrwoh, ki dkhot bad ki nongkyrshan jong ka NPP ki kwah ban pynpaw sha u ma Vincent H Pala ba kum ki paibah nongshong shnong jong ka 1-Nartiang Constituency kiba lah don bynta ruh ban pynjop M.P ïa u kumba 3 sien kynthih kim sngewïahap ïa ka jingkynnoh khlem nongrim ïa u MLA jong ki.
Kampher lada phi khyllew ïa ka spah lajong ba phi don bad ba phi ong ba phi khambun pisa bunshah ïa kiwei pat, hynrei kam long pat kaba sngewtynnad ba phin krenbeiñ bad kynnoh khlem nongrim ïa kiwei da kaba shu pynthohbria khlem ki nongrim ki ba biang bad shu pynbud nam sniew ïa kiwei pynkut ka kyrwoh na u President bad General Secretary ka NPP 1- Nartiang Block Constituency West Jaiñtia Hills.
