Nongpoh K’Lyngkot 30: Ka ophis u Deputy Commissioner ka Ri-Bhoi District ryngkat ka jingïatreilang bad ki tnad sorkar bapher bapher ba kynthup ïa ka ophis u DTO, DRDA, DSWO, DMHO, DLC & DLDM mynta ka sngi ki la pynlong da ka prokram ba kyrpang ban ai jingsumar ei sha ki nongñiah Auto Rickshaw ka thaiñ Nongpoh kaba la tip kum ka ‘One Day Camp on Schemes cum Free Medical Checkup for Auto Drivers’ bala pynlong ha phyllaw jong ka ophis u District Transport Officer ha Nongpoh.
Ka long ruh ka jingkyrkhu kaba khraw ïa ki nongñiah Auto ka thaiñ Nongpoh kiba la wan ban shim ïa kabu ban ïoh ka jingsumar ei ba shisngi ban tip ïa ki jait jingpang bapher bapher khamtam ki skhim bad ki jait Insurance kum ki nongñiah bad kamai auto ki dei ban tip bad ïoh jingmyntoi.
Na ka liang ka Vevotolu Kezo Additional Deputy Commissioner ka Ri-Bhoi District ka la ong ba katei ka prokram kadei kaba la mang kyrpang na ka bynta ki nongñiah auto bad la khmih lynti ba kin poi bun ha kane ka sngi ryngkat ka jingtreilang bad ki tnad sorkar bapher bapher, PMJJBY, SBI, Atal Pension Yojana bad kiwei kiwei bad khmih lynti ba katei ka prokram kan long kaba seisoh bad ai jingmyntoi ïa ki nongñiah auto.
