Nongpoh, Nohprah 05: Ka Meghalaya State Rural Livelihood Society mynta ka sngi kala pynlong da ka prokram ai jinghikai ba kyrpang ïaki longkmie kaba dei ruh shibynta jong ka Nai Chetna-Pahal Badlav Ki Campaign jong ka Ministry of Rural Development ban pynkut noh ïaka jingshah ibeiñ, ka jingshah lehbeiñ jong ki kynthei khamtam ha u lok, haki jaka trei, ha iing ha sem bad haka imlang ka sahlang baroh kawei bala pynlong da ka Meghalaya State Rural Livelihood Mission (MSRLS) ha ophis u Block Development Officer ha Umling.
Ha katei ka prokram la wan ban ai jinghikai da ka kong A Shongwan kaba dei ka Advocate ha Nongpoh kum ka Resource Person, haka jingdonlang ka kong E Lyngdoh Programme Manager ka NRLM, u Bah Eric K Dkhar BDO ka Umling C&RD Block, ki longkmie kiba la wan ban mihkhmat naki SHGs, Village Organization.
Ïa katei ka prokram la sdang ha baroh ki jylla jong ka ri India naduh ka 25 tarik Naiwieng, hynrei ha Ri-Bhoi District la sdang mynta ka sngi ban sa pynkut pat haduh ka 23 tarik Nohprah, da ka jingangnud ba ki longkmie khamtam ki kynthei ki dei ban tip ïaka hok longbriew ba kim dei ban shah lehbeiñ ha kano kano ka jaka kaba ki don bad lyngba katei ka prokram kala long ka jingmyntoi bad ka jingkyrkhu ïaki longkmie ha katei ka sngi.
Naka liang ka kong E Shongwan haba kren ha katei ka sngi, kala pynpaw ba kum kitei ki prokram ki long kiba donkam naka bynta ki kynthei ba ki dei ban tip ïaka hok ka jong ki ban im, namar kim shym la wan ban long mraw hynrei ki kynthei ki don laka jong ka bynta khamtam kum ki longkmie kiba ri ba kdup bad pynheh pynsan ïaki khun.
Kala ong ruh ba haka jylla Meghalaya bun naki longkmie ki mad jingeh ha iing ha sem, ka jingshah shoh shah dat bad shah lehbeiñ ha u lok, hynrei kim nud bad shlan ban mih shakhmat namar ki jingshah byrngem byrsit lada ki pynpaw ne leit ïathuh hano hano, kaba la pynlong pat ïaki ban shu shah ksew ïaki jingeh namar ba ym don ba ïarap ïaki, hynrei ha katei ka sngi kala ai mynsiem pat ïaki para longkmie ba lada don kum kitei ki jingjia kim dei ban shu sngap hynrei ban pyntip sha ki bor ba dei peit ban leh ïa kaba donkam.
