Khliehriat Lber 12: Ka ophis jong ka tnat ICAR-Central Citrus Research Institute (ICAR-CCRI), Nagpur, ha ryngkat ka jingïatreilang bad ka tnat District Horticulture Office, East Jaiñtia Hills District, hynnin ka sngi ka la pynlong ïa ka prokram ai jinghikai kaba shi sngi ha shnong Mookynpad, kane ka prokram ka dei hapoh ka NEH Plan, ka jingai jinghikai ka long halor kumno ban kyntiew bad ban pynthymmai ïa ka rukom rep soh ñiamtra bad ïa ka prokram baroh kawei la pyniaid da u Dr. Dilip Ghosh, uba dei u Director, ICAR-CCRI, Nagpur.
Ha katei ka sngi ba ai jinghikai ban rep sohñiamtra, ki la don haduh sanphew lai ngut kiba la wan shah hikai bad ki la ïa don lang ruh ki heh sorkar na ka tnat Horticulture, ki riew rangbah na ka shnong, ki la pynlong ruh ïa ka jingpynrung kyrteng ïa ki nongrep.
La ioh ïa ka jingkren na u Assistant Director of Horticulture, Khliehriat, East Jaiñtia Hills District, u bah Stanly Roy Mulieh bad u la pynsngew ïa ka jingdonkam ban kyntiew ïa ka rukom rep da scientific horticultural practices kaba da ki jingstad science khnang ban dup lah ban kyntiew shuh shuh ïa ka jingrep sohñiamtra.
U Dr. Evening Stone Marboh, Senior Scientist, ICAR-CCRI, RRCC bad u Biswanath Chariali, kiba na Assam, ki la ai ïa ki jingkren maitphang ha kaba ïadei bad ka rukom rep kaba ju tip kum ka Citrus Farming ba u soh un kham bha namar u sohñiamtra u iahap ban rep ha kine ki jaka ba ju tip ruh kum u Khasi Mandarin.
U Wahehshnong jong ka shnong Mookympad u bah Tiewly Sutnga, u la ai ka jingkyrshan bad jingpynshlur ïa ki paidbah nongrep soh ba kin rep ïa u soh ñiamtra da kane ka buit thymmai ka Citrus Farming
Ka District Agriculture Officer, East Jaiñtia Hills District, ka kong L. Lakiang ka la kyntu ïa ka sorkar ba kan ai ka jingkyrshan da kaba ai jinghikai ïa ki nonrep soh ba kin dup tip bha ïa kane ka rukom rep soh ñiamtra kaba da ka Citrus Farmming.
Ka Dr. Marboh ka la pyniaid ïa ka bynta kaba dei ka technical session bad ai ruh ka jingkren kaba bniah ha kaba ïadei bad ka rukom rep ka citrus Farming.
Kane ka jingai jinghikai ka la long ka jingmyntoi ïa kiba la wan sha katei ka prokram ai jinghikai ha kaba la pyni nuksa ruh ïa ka rukom rep Bordeaux Paste bad Bordeaux Mixture,. Ka la don ruh ia jingiaphylliew jingmut hapdeng ki nongrep bad ki scientists ha kaba ïadei bad ki rukom rep ba ki rep bad ruh ki jingeh ba ki nongrep ki iakynduh.
La pynkut ïa katei ka prokram ai jinghikai da kaba sam ïa ki tiar rep sha ki nongrep bad kane ka prokram ai jinghikai ka long ruh kum ka jingpynkup bor ïa ki nongrep ha kaba ïadei ruh bad ka jingsam jingtip halor ka rukom rep citrus farming.
