Jowai, Nailur 12: Ka resol jong ki jingïalehkai ka lympung ïalehkai phutbol jong ka kyrdan 1st Division League 2025 bala pynïaid daka East Jaiñtia Hills District Football Association (EJHDFA) kaba la long hynne ka sngi Thohdieng (12 tarik Nailur, 2025) ha madan Artificial Diengshynrum, Khliehriat.
Haba phai sha ka jingïakhun kaba nyngkong la ïohi ïa ka Byndihati CSC kaba la pynliem da 6-1 kol ïa ka Rangad SCSC.
U Lungouhao Hangshing u la long u namtam na ka bynta ka Byndihati CSC da kaba thep hat trik lyngba ki kol ha ka minit kaba 12, 57 bad 68, katba na ka liang jong u Lengungin Hangshing u la noh synñiang 2 kol haka minit ba 10 & 78, bad u Rahul Nongtdu u la thep shi kol ha ki minit shuwa ban kut ka por (90+4).
Ka Rangad SCSC ka la ïoh ban pynphai ïa ka shi kol lyngba u Jerry Lyngdoh haka minit ba 37.
Katba haka jingïakhun kaba ar hapdeng ka Rymbai Wahshnong SC bad ka Ladrymbai Dongwah SWSC kala poi sha ka jingïakhaid ha kaba baroh arliang ki la thep mar 1-1 kol.
Baroh arliang ki la pynkhihjar ha ka kylla miet, ha kaba ka Rymbai Wahshnong SC ka la ïoh lamkhmat nyngkong lyngba ka kol kaba la thep da u Jerick Rymbai haka minit ba 54. Hynrei ka Ladrymbai Dongwah SWSC ka la jubab da kaba pynïakhaid lyngba u Ariel Najiar haka minit ba 87.
Ki jingïalehkai kin bteng haka 15 tarik u Nailur ha ki ar tylli ki jingïakhun.
