Nongpoh, Nailur, 09: U Tbn. Jor Sing Syiem na ka shnong Mawrong Ri-Bhoi District, u ba dei u ophisar IAS ba nyngkong na Ri-Bhoi District u la khlad noh syndon na kane ka sla pyrthei hynnin ka 8 tarik Nailur haka rta kaba 84 bad ka jingleit on tep ïa u kan long haka 10 tarik Nailur 2025.
Haba phah ïa ka kyrwoh na ka liang ka Synjuk ki Rangbah Shnong Ri-Bhoi District lyngba u Bah BB Makdoh Chairman bad u Bah PB Sylliang General Secretary ki la pynpaw ba u Tbn Jor Sing Syiem u dei shisha u nongïalam bad u rangbah u ba shlur bad ba don burom bad ka jinglong trai-ñiang jong u bad ka jingtrei shitom jong u ka la pynlong ia ka Ri Bhoi baroh kawei ban sarong bad ruh ban kynduh ïa ki lad thymmai ha ka roi ka par.
Kum ki nongshong shnong ka dong Ri Bhoi baroh kawei, ngi ai ka jingsngewnguh kaba khraw halor ka jingshakri bad ka jingai mynsiem jong u ha ka imlang sahlang. U dei shisha u nongïalam kyntang ba la pynneh ïa ka burom bad ka nam jong ngi baroh.
Na ka liang ka Synjuk ki Rangbah Shnong Ri-Bhoi ka phah ruh ka kyrwoh sngewlem ïa ka iing ka sem baroh kawei jong u Tbn Jor Sing Syiem ryngkat ki jingduwai ba u Blei nongbuh nongthaw un pyntngen bad ri sumar ïa ka iing ka sem watla ki mad ïa ka jingkthang ka mynsiem bad ka jingeh ha kum kane ka por.
